Лайихлувилер екебур я

Дербент  шегьердин дуьньядин динринни культурайрин музейда Мамедкъаладин аялрин художественный школадин 45 йис тамам хьуниз талукьарнавай яратмишунрин выставка кьиле фена.

1972-йисуз кардик акатай, Да­гъустанда сад лагьайди тир аялрин художественный и школада яратмишунрин рекьяй тежриба авай муаллимривай 800-далай гзаф аялри чирвилер къачуна. Абурукай гзафбуру худо­же­ст­вен­ный училищейрани вузра чир­вилер къачун давамарна, уьлкведин гзаф пипlера зегьмет чlугвазва.

Выставка тешкилай Дербент райондин администрациядин культурадин, милли политикадин ва диндин крарай отделдин регьбер Секинат Сеидовадин ­гафаралди, художественный шко­­лада вердишвилер къачур аялар неинки республикада, Россиядин регионра, гьакlни ма­са уьлквейра тухвай гзаф выставкайрин, конкурсрин ва аялрин яратмишунрин фестивалрин иштиракчияр — гъалиб­чияр я.

Мярекатдиз Дербент райондин администрациядин кьилин заместителар Сеидмегьамед Бабаев, Садир Эмиргьамзаев, Анвер Гьажимурадов, Фуад Ши­хиев, райондин депутатрин Собранидин председатель Мажмутдин Семедов ва масабур мугь­ман хьанвай.

Сеидмегьамед Бабаева муаллимриз, аялриз ва атанвай мугьманриз  юбилейдиз  талукь мярекат вичин ва Дербент райондин кьил Мегьамед Желилован патай  мубаракна.

—  1972-йисалай инихъ шко­ла­­­да чирвилер къачунвайбуру Японияда, Мексикада, Амери­ка­да, Францияда, Индияда, Бол­­гарияда, Польшада кьиле тух­вай саки 120 международ­ный­ выставкада иштиракна. Эхи­­­римжи агалкьунрикай яз Москвада кьиле фейи Вири­россиядин аялринни жаванрин яратмишунрин фестивалда  иштиракун къейд ийиз жеда, — лагьана ада.

Эхирдай С.Бабаева школадин директор, РД-дин лайихлу­ художник, Россиядин художникринни дизайнеррин Союздин член Гьамзат Гьуьсейновав ва тафаватлу хьайи аялрив райондин кьилин патай грамотаярни чухсагъулдин чарар вахкана.

Къагьриман Ибрагьимов