Къуватар сад авуналди

“Дидеяр наркотикриз акси я” марафондин сергьятра аваз 16-майдиз Ахцегь РДК-дин залда “Чун сагълам уьмуьр патал алахъзава!” лишандик кваз райондин жегьилрин наркотикризни пиянискавилиз акси форум кьиле фена.

Райадминистрациядин куьмекдалди  РД-дин жегьилрин крарин рекьяй министерстводин ва наркотикар ишлемишунин вилик пад кьунин рекьяй РФ-дин Федеральный къуллугъдин Дагъустанда авай Управленидин векилри тешкилай и важиблу мярекатдин кьилин мурад жегьилар, куьчедин пис таъсирдикай хкудна, спортдал желб авун ва наркотикар ишлемиш тавунихъ элкъуьрнавай кIвалах гегьеншарун тир.

Форумдин кIвалахда райондин школайрин завучри, тербиячийри, вожатыйри ва чIехи классра кIел­за­вай аялри иштиракна. Мярекат, мугьманар ва форумдин иштиракчияр тебрикуналди, Ахцегь райондин Соб­ранидин председатель Абдулкерим Палчаева ачухна. “Наркомания — им ахьтин пис азар-тIал я хьи, халкьдин арада чукIунин ва хаталувилин уьлчмейрал гьалтайла, ам гьатта атомдин яракьдив гекъигиз жеда. И завалдихъ галаз женг чIу­гунин карда вири обществодин сагълам къуватар тупламишунин чарасузвал ава”, — лагьана ада ва Ахцегь райадминистрацияда же­гьил­рин политикадин ва спортдин рекьяй­ кьилин пешекар Назиля Исмаиловадихъ галаз санал же­гьил­рин арада  тербиядинни профилактикадин хъсан кIвалах тухунай са жерге активистриз Ахцегь муниципалитетдин гьуьрметдин грамотаяр гана.

РД-дин жегьилрин крарин ре­кьяй министерствода наркоманиядихъ галаз женг чIугунин хилен начальник Юсуп Гьуьсейнова залда авайбур тебрикна ва жегьилрин беденризни психикадиз-къанажагъдиз наркотикрикайни ичкидикай авай еке зарардикай лагьана.

Ахпа форум секцийриз паю­нал­ди давам хьана. “Сагълам уьмуьр” секциядин кIвалах А.Гъаниеван тIва­рунихъ галай ДЮСШ-да же­гьил спортсменрихъ галаз женгинин самбодай Россиядинни дуьньядин чемпион Велимурад Алхасова, “Наркоманиядин вилик пад кьун” секциядин кIвалах РД-дин МВД-да профилактикадин кIвалахдин отделдин начальник, полициядин майор Надежда Сейфудиновади тухвана.

Ада къейд авурвал, Дагъустанда  наркодиспансердин  учётда 5381 кас  наркоманар ава. Абу­рукай Ахцегь районда  — 108 кас          (43 ичкибазар, амайбур наркоманар я). И ре­къемар гьакъикъатда са шумуд сеферда гзаф тирди аннами­шай­тIа, чун еке бедбахтвилин сер­гья­т­дал ала. Иллаки пис кар ам я хьи, нарко­тикар квай шейэр цунихъ, ху­ь­нихъ, ишлемишунихъ ва чу­кIу­­­ру­­нихъ галаз алакъа­лу тахсиркар­вилер эхиримжи вахтунда “же­гьил” хьанва. Бязи аялри гьеле 10-11 йиса аваз наркотикрин дад ак­вазва.

Алай вахтунда РФ-да 20 миллион кас  ичкибазар ава, наркотикар ишлемишзавайбурукай саки   70 % жегьилар я. Набутар, наркоманар, ичкибазар гзаф жезва, ­сагълам жегьилри лагьайтIа, анжах 25 % тешкилзава. Къалабулух кутазвай и гьалар хъсан патахъ гьикI дегишариз, наркоманиядин вилик пад чавай гьикI кьаз жеда? Чка-чкада диде-бу­байрин, муаллимрин, къайдаяр хуьдай органрин, са гафуналди, вири обществодин сагълам къуватрин къаст-къуват сад авуналди.

Дашдемир  Шерифалиев