“Чи ватанэгьлияр — гьар сана” рубрикадин сергьятра аваз, и сеферда чна газет кIелзавайбур медицинадин илимрин доктор, профессор, Чечен Республикадин государстводин медицинадин институтдин кафедрадин заведующий Эдгар Сабирович Къафаровахъ галаз танишарда.
1977-йисуз Къазахстандин ЦIийи Уьзен шегьерда дидедиз хьайи ада 1994-йисуз Сулейман-Стальский райондин Агъа СтIалрин-Къазмайрин юкьван мектеб, 2000-йисуз Астрахандин медакадемия акьалтIарна. Хъсан чирвилер ва алакьунар авай Эдгар Къафаров аспирантурадиз гьахьна ва 2004-йисуз — медицинадин илимрин кандидатвилин, 2014-йисуз докторвилин диссертацияр хвена.
2000-2013-йисара чи ватанэгьлиди Астрахандин медакадемияда инсандин анатомиядин кафедрадин старший преподаватель яз кIвалахна. 2013-йисуз адаз Чечнядин мединститутдин руководстводи чпин вуздиз хтун теклифна. Эдгар Къафаров Грозный шегьердиз хтана ва алай вахтунда ада къунши республикадин медицинадин кьилин вузда тади куьмекдай хирургиядин ва тIебии топографиядин анатомиядин кафедрадин заведующий яз кIвалахзава.
Къейд ийин хьи, медицинадин кукIушрихъ физвай четин жигъирра къазанмишнавай агалкьунрай, вузда гьакъисагъвилелди зегьмет чIугунай Эдгар Къафароваз Чечен Республикадин профсоюзри “Медицинада — лайихлувилерай” гьуьрметдин знак, мединститутдин руководстводи Гьуьрметдин грамота ва маса шабагьар ганва.
Агьмед Магьмудов
