Эхиримжи вахтара Мегьарамдхуьруьн районда Экологиядин йисаз талукьарнавай са жерге серенжемар кьиле тухвана.
“Экологиядин десантдин” сергьятра аваз тешкилнавай нубатдин мярекат 23-июлдиз хьана, хабар гузва Мегьарамдхуьруьн райондин администрациядин информациядин отделди.
Ихьтин мярекатар тухунин макьсад гьар са касдин рикIе тIебиат хуьнин, адав мукъаятдиз эгечIунин гьиссер тун, акьалтзавай несил хайи хуьруьн, райондин тIебиатдив дикъетдивди, игьтиятлудаказ эге-чIиз вердишарун, тербияламишун я лагьайтIа жеда.
Экологиядин серенжем кьиле тухунин теклиф гайиди ва ам тешкилайди муниципальный райондин чкадин самоуправленидин органрихъ галаз алакъада хьунин ва гражданрин арзайрихъ галаз кIвалахунин отдел я. Серенжемдин тереф райондин администрациядин жегьилрин крарин ва туризмдин рекьяй отделди, райондин Жегьилрин парламентди ва волонтерри хвена. Нетижада экологиядин серенжем гегьенш майданра тешкилнавай мярекатдиз элкъвена.
Серенжемда райондин Филерин, КьепIир-Къазмайрин, Тагьирхуьруьн-Къазмайрин, Билбилхуьруьн-Къазмайрин ва Самур хуьрерин кьилери активнидаказ иштиракна. Къейдна кIанда хьи, и карда гьам жегьилри, гьамни чIехи несилди тIебиатдив эгечIунин жигьетдай чпин фикирар сад тирди, яни алукьзавай несилриз яшайишдин сагълам тир шартIар, михьи тIебиат тун гьар са касдин буржи тирди малумарна.
Мярекатдин сергьятра аваз гьам хуьрерин куьчеяр, гьамни гьуьлуьн кьер зирзибилдикай михьна, къайда туна. Экологиядин субботникдин иштиракчийри кIватIнавай зирзибил “ЖКХ” МУП-ди чара авунвай машинра аваз лазим чкадиз тухвана.
“Михьивал къакъажзавай чкада ваъ, михьиз хуьзвай чкада жеда” лугьудай мисал рикIел хкиз кIанзава. Эгер чакай гьар сада и мисалдал амал авуртIа, са шакни алач, инсаниятдилай экологиядихъ галаз алакъалу гзаф кьадар месэлаяр гьялиз алакьда.
«Лезги газет»
