Къизилюртда къурушвийри дуьньядин чемпионатдин гъалибчи Радик Къулиев тебрикна

Мукьвара Парижда кьилей фейи дуьньядин чемпионатда грекринни римлуйрин жуьреда кьуршахар кьунай гимишдин медаль къазанмишай Радик Къулиев 9-сентябрдиз Къизилюртда яшмиш жезвай къурушвийри шадвилин гьалара къаршиламишна. Кьегьал къурушви тебрикуниз бахшнавай мярекат шегьердин администрациядин дараматда кьиле фена.

Ана Къурушрин интеллигенциядин, СМИ-дин векилри иштиракна. Мярекат Къизилюрт шегьердин мэрдин 1-заместитель Седредин Жафарович Жафарова ихьтин гафаралди ачухна: — Гьуьрметлу ватанэгьлияр! Чи  хуьруьнвийрин уьмуьрда кьиле физвай шадвилин лишанлу вакъиайри, са шакни алачиз, Къизилюртда яшамиш жезвай къурушвийрин руьгьни хкажзава. Чпин агалкьунралди хайи хуьруьнни жемятдин тIвар виниз акъудзавай кьегьал рухвайриз иниз теклифун, абур лайихлу дережада аваз тебрикун чун паталди адетдин кардиз элкъвенва. Виликдай чна ина Олимпиададин къугъунрин буьруьнждин сагьиб Жавид Гьамзатов лап вини дережада аваз къаршиламишнай. Къе Къизилюртда уьмуьр кечирмишзавай къурушвийриз шадвилин гьалара  санал кIватI жедай  мумкинвал чи дамахлу хва, Парижда къалурай вичин алакьунралди неинки хайи хуьруьн, гьакIни республикадин, уьлкведин тIварни вири дуьньядиз машгьур авур Радик Къулиева ганва. Дуьньядин чемпионатда гимишдин медаль къазанмишун регьят кар туш, ам варцаралди, йисаралди чIугунвай акьалтIай четин зегьметдин нетижа я. Эхиримжи йисара къурушвийрин тIвар вини гьуьндуьрдиз акъудай пагьливан рухваяр майдандиз акъатуни чун кьадарсуз шадарзава. Абурун Арадай яз Гьабиб Аллагьвердиеван, Жавид Гьамзатован, Фарид Адигуьзелован, Радик Къулиеван ва масабурун тIварар кьаз жеда. Аферин чпиз. Гьуьрметлу Радик, гележегда вуна Европадин, дуьньядин чемпионатрай хайи ватандиз къизилдин медалар хкидайдак ва гьатта Олимпиададин къугъунра пьедесталдин вини кIарцел хкаж жедайдак чна еке умудар кутазва, — лагьана Седредин Жафаровича ва шегьерда яшамиш жезвай хуьруьнвийрин патай Радикав къиметлу савкьатар вахкана.

Гуьгъуьунлай анал рахай Къизилюртда яшамиш жезвай къурушвияр тир Зульфикъар Эльдерова, Камал Ханбабаева, шегьердин Собранидин депутат Селим Къубатова, шегьердин Общественный палатадин член Давуд Эфендиева, ина кардик квай «Къуруш» тIвар алай обществодин председатель Рамиз Мегьамедова, Олимпиададин къугъунрин буьруьнждин медалдин сагьиб Жавид Гьамзатова, ЦIийи Къурушдилай атанвай мугьманрикай РД-дин лайихлу муалимар тир Насир Алхасова, Аслан Эскендарова, «Къурушрин сес» газетдин кьилин редактор Муса Агьмедова дуьньядин чемпионатдин гимишдин сагьибдин тIварцIихъ хуш келимаяр лагьана ва гележегда адахъ мадни еке агалкьунар хьун алхишна.

Мярекатдин кьвед лагьай пай «Парнас» ресторанда гурлудаказ давамарна…

«Лезги газет»