Дагъустан Республикадин “Ком­плексный логисти­кадин центр эцигун” кар алай проектдин сергьятра аваз Дер­бент районда ин­вестицийрин ООО “ФерЭльГам” проект кьилиз акъуд­­зава.

И проектдин бинеда Дагъустанда ви­­низ тир технологийрикай менфят къачуна туькIуьрнавай алай аямдин тепличный комплексар эцигун ава. Иник хуьруьн ма­йишатдин суьрсет гьасилзавайбурувай салан майваяр къачун, абур яргъалди хуьдай шар­тIар тешкилун, гьавадин чимивал лазим къайдада хуьз жедай системаяр кардик кутун, консервироватнавай суьрсет маса гун, гьакlни агьалияр­ йи­сан кьиляй-кьилиз майвайралди ва хуьруьн майишатдин  виниз тир еридин маса продукциядалди таъминарун ква.

ООО “ФерЭльГам” проектдин сергьятда аваз 400-дав агакьна кIва­лах­дай чкаяр арадал гъанва.

Дербент райондин администрациядин аграрно-промышленный  управленидин руководитель Юсиф Герейханов и мукьвара майваяр цанвай майишатдиз мугьман хьана. Карханадиз вич Московский областдай тир Дмитрий Смагина регьбервалзава.

“55 гектар чиле цанвай помидорри —  60 тонндив, 4,5 гектарда цанвай афнийри  30 тонндив агакьна бегьер ганва. Алай вахтунда,  40 градусдин чимивилер аватIани, афниярни помидорар лап хъсан гьалда ава. Чна 500 тонндив агакьна помидорарни афнияр маса гун патал  рекье тунва”, — малумарна Дмитрий Смагина.

Юсиф Герейханов ва Дмитрий Смагин майишатда кIвалахзавай ксарихъ галаз гуьруьшмиш хьана, абурун теклиф­рихъ яб акална.

Бегьер кIватIун гьеле давам жезва.

Къагьриман Ибрагьимов