“Кьурагь район” МР-дин кьил Замир Азизован регьбервилик кваз мукьвара кьиле фейи совещанида райондин администрациядин аппаратдин къуллугъчийри, хуьрерин муниципалитетрин кьилери ва секретарри иштиракна.
Райадминистрациядин пресс-къуллугъди хабар гузвайвал, совещанидал район патал важиблу месэлаяр гьялна: “Хуьрерин поселенийрин сайтрин кIвалах тешкилунин гьакъиндай”; “Государстводин къуллугъар ийизвай сад тир порталда агьалияр регистрация авунин кIвалах тешкилунин гьакъиндай”; “Руководителри чпел тапшурмишай крар кьилиз акъудунин низамдин гьакъиндай”.
Сад лагьай месэладин жигьетдай системный администратор Замир Наврузова лагьайвал, вири поселенийрин сайтар кардик кутунватIани, абур буш я ва чкайрал кьиле физвай вакъиайрикай малуматарни эцигзавач. Я сайтрин гьакъиндай жавабдарвал хиве авай ксарни тайнарнавач. Сад тир порталда агьалияр регистрация авунин месэлани татугай гьалда ава.
Райондин администрациядин аппаратдин руководитель Фикрет Медетова талукь документар электронный къайдада санай-масаниз рекье твадайвал кIвалах тешкилун лазим тирдакай лагьана. Ада хуьрерин поселенийрин кьилеривай куьгьне компьютерар цIийибуралди эвезун ва са куьруь вахтунда электронный къайдайрал элячIун истемишна.
Райондин администрациядин кьилин заместитель Махач Хариева къейд авурвал, Аладашдин, Ашарин, Гельхенрин, КIутIулрин, КIирийрин ва гьакI маса поселенийрин кьилерини чпел тапшурмишнавай бязи крар кьилиз акъудзавач. Абуру районда тешкилзавай культурадин, спортдин кар алай мярекатра иштиракзавач. Бязи хуьрерин поселенийрин кьилери райондин администрациядай ракъурзавай важиблу чарар эхирдалди кIелзавач ва анра къалурнавай крар кьилиз акъудунин гьакъиндай вахтунда хабарни гузвач.
Совещанидин нетижаяр кьадайла, Замир Азизова хуьрерин поселенийрин кьилер къейднавай татугайвилер кьве гьафтедин вахтунда арадай акъудунин гьакъиндай таъкимарна. Гьа са вахтунда вичин заместителрал ва хуьрерин администрацийрин кьилерал налогар кIватIзавай кардални гуьзчивал тухун тапшурмишна.
«Лезги газет»
