Мукьвара “Лезги газетда” Ахцегь райондин вири мектебра тарсарилай вилик аялар патал зарядка тухунин хъсан адетдал чан хканвайдан гьакъиндай малумат кIелайла, зи рикIел ихьтин агьвалат хтана.
Зун Ватандиз къуллугъна, кIвалахдай ашкъи-къуват аваз хуьруьз хтана. ВЛКСМ-дин райкомди заз жуван хайи хуьруьн мектебда пионервожатыйвал авун теклифнай. А девирда мектебдин директор вичин кIвалах чидай пешекар Зайнали Гьажалиев тир.
Са сеферда муаллимрин собранидал за гьар экуьнахъ, тарсарилай вилик аялар патал зарядка тухунин теклиф ганай. Ихьтин меслятдин тереф вири муаллимри, директордини хвенай. И адет чи школада гзаф йисара давам хьана. 1991-йисуз девирар, директорар дегиш хьуникди, хъсан и адет давамардай касни хьаначир.
Зи фикирдалди, аялар ахварай аватун, абурун фикир тарсарал желбун патал гьар са мектебда тарсарилай вилик зарядкаяр тухуз башламиш хъувунайтIа, хъсан жедай. Алай вахтунда аялар кIвале компьютеррихъ гала, школадиз фидай рекьени вилер мобильный телефонра ава, гьавиляй тарсара абуру “ахварарзава”. Абур и краривай физкультурадин, экуьнин зарядкайрин куьмекдалди яргъазна кIанда. Ша, чна чи гележегдин несилрикай фикир ийин, абур савадлу, акьуллу, гьуьрмет-хатур чидай сагъламбур яз чIехи ийин.
Райсудин Набиев
