Дагъустандай тир 100 касдикай ибарат делегацияди Кеферпатан Кавказдин СМИ-рин V форумда иштиракда. Мярекат 28-ноябрдилай 1-декабрдалди Ингушетияда кьиле фида.
“Лезги газетдиз” общественный теклифрин регионрин уртах “Кеферпатан Кавказ” тIвар алай центрадай хабар гайивал, ихьтин мярекат кьиле тухуниз талукь малумат форумдин оргкомитетдин заседанидал 9-октябрдиз раиж авуна.
Ингушетиядин кьил Юнус-Бек Евкурова къейд авурвал, форумдин кьилин мурад массовый информациядин такьатрин куьмекдалди СКФО-дин гьакъиндай хъсан фикирар арадал гъуникай ибарат я. Адан гафаралди, журналистрин фестиваль регионда сифте яз тухузвайди я ва ам вини дережада аваз кьиле фин лазим я. “Форумди властриз масадбурухъ яб акалунихъай, хци месэлайриз жаваб гунихъай ва чпин жавабар делилламишунихъай кичIе туширди къалурун герек я. Маса гафаралди лагьайтIа, властринни журналистрин арада алакъа авайди субутарун лазим я”, — къейдна Евкурова.
Заседанидин сергьятра аваз форумдин кIвалахдин асул терефар тестикьарна. ИкI, са шумуд юкъуз пленарный заседанияр, пешекаррин дискуссияр, элкъвей столар ва мастер-классар кьиле тухуда. Журналистар патал гьакIни экскурсийрин программа, Кавказдин массовый информациядин такьатрин выставка гьазурзава. Форумдин нетижайрал асаслу яз са жерге икьраррал къулар чIугун фикирдиз къачунва.
Идалайни гъейри, 1-декабрдиз журналиствилин “Медиа Кавказ” конкурсда гъалиб хьайибурув шабагьар вахкунин шадвилин мярекатни кьиле фида. “Кеферпатан Кавказ” МЦОИ-дин исполнительный директор Залму Мегьамедовади хабар гайивал, 2017-йисуз Кавказдин СМИ-рин векилри конкурсда иштирак авун патал 16 номинациядай 357 заявка ганва. Абуруз алай вахтунда жюри килигзава.
Идалайни гъейри, тешкиллувилин комитетди СКФО-дин регионра авай СМИ-рин кьадардиз талукь делилрал бинеламиш хьуналди, гьар са республика патал квота тайинарнава. Гьа икI, форумда Дагъустан Республикадин ва Ставропольский крайдин патай гьар санай 100 векилди, Кеферпатан Осетия-Алания Республикадин патай — 60, Кабардино-Балкариядин, Карачаево-Черкесиядин ва Чечен республикайрин патай гьар санай 50 векилди иштиракда.
РикIел хкин, Кеферпатан Кавказдин федеральный округда РФ-дин Президентдин патай тамам ихтиярар ганвай Векилдин аппаратдин куьмекни галаз форум тешкилзавайди “Кеферпатан Кавказ” МЦОИ я. Форумдин кьилин амадагвал “Кеферпатан Кавказдин курортар” компанияди ийизва.
РД-дин печатдин ва информациядин министерстводин пресс-къуллугъ
