И йикъара ЦIийи Кяхулай поселокда (Махачкъала шегьер)  шад мярекат кьиле фена. Анин “Городская” куьчедиз Дагъустандин тIвар-ван авай государстводин ва общественно-политический деятель  Кебир  Межидович  Гьасанован  тIвар гана.

Кебир Гьасанов Докъузпара райондин Чахчарин (гилан Мегьарамдхуьруьн район) хуьре дидедиз хьана. 1933-йисуз педагогвилин институт акьалтIарайдалай кьулухъ ада Махачкъаладин 5-нумрадин юкьван школада муаллимвиле ва директорвиле кIвалахна. Ватандин ЧIехи дяведин йисара (1941-1942) 30 йисан яшда авай Кебир Межидович Махачкъала шегьердин горисполкомдин председателвиле хкяна. 1944-йисуз ам Дагъустандин къенепатан органриз кIвалахиз рекье туна. Ина адакай республикадин МВД-дин министрдин заместитель хьана.

1952-йисуз СССР-дин МВД-дин офицеррин кьилин школа акьалтIа­райдалай кьулухъ адаз полковникдин чин гана; ада республикадин къе­непатан органра 20 йисалай виниз вахтунда регьбервал гудай къул­лугърал кIвалахна.

Отставкадиз экъечIайдалай кьулухъ Кебир Межидович Гьасанова республикадин профсоюзра вичин зегьметдин рехъ давамарна. Адакай ина туризмдинни экскурсийрин рекьяй облсоветдин председатель, ахпа профсоюзрин курсарин директор хьана. Адан яргъал йисарин бегьерлу зегьмет “Знак Почета” орден ва хейлин маса шабагьар гуналди къейдна.

Дагъустандин къенепатан органрин ветеранрин Советдин, хуьруьнвийринни мукьва-кьилийрин иштираквални аваз, 2011-йисуз республикадин руководстводин вилик Кебир Межидович Гьасанован тIвар эбеди яз несилри рикIел хуьн патал Махачкъаладин са куьчедиз гун тIалабнай. И кар гила кьилиз акъатна.

Шадвилин мярекатдал Дагъустандин ветеранрин Советдин  председатель Магьарам Алижанов, республикадин профсоюзрин объединенидин председатель Абдула Мегьамедов, РД-дин МВД-дин личный составдихъ га­лаз кIвалахдай управленидин от­дел­дин начальникдин заместитель Илгьам Агъаев, Махачкъала ше­гьер­дин депутатрин Собранидин председателдин сад лагьай заместитель Паша Аллагьвердиев, Мегьарамдхуьруьн райондин Чахчарин хуьруьн кьил Омар Зиятханов, республикадин профсоюзрин объединенидин председателдин заместитель Муса Билалов рахана.

Кебир Межидовичан мукьва-кьилийрин ва хуьруьнвийрин тIваруни­хъай мярекатдал адан хтул Абдулашим Гьасанов рахана. Ада ихьтин лишанлу кардик кьил кутур ва кьилиз акъудай вирибуруз сагърай лагьана.

Мердали Жалилов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя