Мукьвара Дагъустан Республикадин культурадин ирс хуьнин рекьяй Агентстводин руководитель Заур Къагьриманова Кьурагь райондин агьалияр кьабулна. И гуьруьшда “Кьурагь район” МР-дин кьил Замир Азизова, адан заместителри, райадминистрациядин управленийрин руководителри, культурадин идарайрин къуллугъчийри ва прессадин векилри иштиракна.
Кьурагь райондин хуьрера тарихдин, культурадин, архитектурадин лап къадим имаратар ава. Гьайиф хьи, къенин йикъалди абур вири хуьз хьанач. Кьиблепатан Дагъустандин хуьрера сифтебурукай яз эцигай ва къенепатан цлар рангунин шикилралди безетмишнавай Кьуьчхуьррин Жуьмя-мискIин, Шимихуьруьн душмандикай хуьдай къеле, Вини Макьарин минара чкIана. Куьгьне хейлин маса имаратарни татугай гьалда ава. Идакай гуьруьшдиз атай районэгьлийрини лагьана.
Усугърин хуьруьн администрациядин кьил Жавид Къурбанова Хвережрин кьакьан минара хъсандиз ремонтун патал пулдин такьатар герекзавайдакай малумарна.
Шимихуьруьнви Абдулкерим Гьажимурадова чкIанвай къеле арадал хкун патал куьмек гун тIалабна. Ада гьакIни Алан-дереда лап къадимлу сурар авайдакай ихтилатна. Заур Къагьриманова и месэладиз еке фикир гана ва къадим сурарин шикиларни яна, Агентстводин тIварунихъ гегьенш чар кхьин меслятна.
Дагъустан Республикадин милли музейдин Кьурагьрин филиалдин директор Расим Назаралиева, музейдин дарамат ремонтна, цIийи экспонатар къачуна кIанзавайдакай ихтилат кудна.
З.Къагьриманова вичин рахунра къейд авурвал, халкьдин культурадин ирс хвена кIанда. Россиядин Федерациядин культурадин министерстводин федеральный махсус программадик кутунвай тарихдин, архитектурадин имаратар кутугай гьалда хуьн патал Агентстводи РФ-дин Госдумадин депутатар тир дагъустанвийриз чарар кхьенва.
Хийир Эмиров
