ИкI тавун тIалабзава

Вахт  зулунди  яз  гьисабзава­тIа­ни, гьаваяр гатуз хьиз чимизма. Исятда халийрин хъсан вахт я. Базаррал, туьквенра абур бул я.

Виликрай гьар са колхоздиз, совхоздиз паласайра халийрин кьилдин салар жедай. Вахтар алатна. Гила мумкинвал авай гзафбуру чпин салара, бустанра халияр битмишар­зава. Амма пулуна вил авай бязи ксар халияр, иллаки зулунбур, фад дигми­ша­риз алахъзава. Халияр еке хьана, алай чка малум жедайла, абуруз селитрадин рапар язава. И рапари, агрономри тестикьарзавайвал, халидин къенепад вахтундилай фад яруни, екени ийизва. Незвайдаз адакай хийир авач.

И кар тестикьардай делил гъин. Са тIимил йикъарин вилик заКьасумхуьруьн базардай еке кьуд хали къачуна. Абурукай 10-12 кило къведай хьтинди къурна, са арадилай атIуда лагьана, холодильникда эцигна. Герек атай чIавуз холодильник ахъагъайла акурвал, халидай, каф  кьилел алаз, яд физва (шикилда). Санлай къачурла, адай литрдилай артух хьиз яд акъатна, патав гвай затIарни вири кьежирна, чIурна. АтIана — къенепад вири яд я. Верчериз вегьейла, цур къачунвайдаз абуруни са артух яб ганач.

И  кардин патахъай за тежрибалу агрономдивай хабар кьуна. Адани ам селитрадин рапарин нетижа тирди тестикьарна. Рапар ягъай чкаяр муьрхъведин ранг алаз къене ва къецел патайни чир жезвай. ГьакI хьайила, халийрал рикI алайбуруз зи меслят я: къачузвай халийриз дикъетдивди килига, заз гьатай хьтинбур кьисмет тежервал. Инлай кьулухъ зани и кардиз фикир гуда.

Халияр битмишарунал машгъул жезвайбурувай ихьтин нагьакьан крар гележегда тавун тIалабзава.

«Лезги Газет»