Ватандин ЧIехи дяведин фронтра 180 агъзурдалай гзаф дагъустанвийри кьегьалвилелди женг чIугуна. Абурун жергеда Ахцегьрин хуьряй тир Микаил Вагьабовни авай.
Гьайиф хьи, чахъ адакай тамам делилар авач. Дяведилай виликан девирда ада Ахцегьрин школа-интернатда тарихдин тарсарин муаллимвиле кIвалахзавай. 1997-йисуз чапдай акъуднавай “Са-садан тIвар кьан” тIвар алай РикIел хуьнин ктабдин кьвед лагьай томда адакай ихьтин делилар ава:
“Микаил Вагьабов 1914-йисуз Ахцегь райондин Ахцегьрин хуьре дидедиз хьана. Ахцегь РВК-ди армиядин жергейриз эверна. Жергедин аскер. 1941-йисан сентябрдиз гел галачиз квахьна”.
Ватандин дяве башламиш хьайила, М.Вагьабова Брестдин къеледин гарнизонда политруквилин везифаяр тамамарзавай. Женгинин ва недай суьрсетдикай, гьатта цикайни магьрум хьанвай гарнизонди са вацралайни гзаф вахтунда, паталай куьмек атунин умуд авачиз, къеле игитвилелди хвена. И гарнизондин чIехи пай аскерриз, гьа жергедай яз Микаил Вагьабовазни, хайи ерийриз элкъвена хтун кьисмет хьанач. Гзафбур телеф хьана, муькуьбур гел галачиз квахьна.
Гьавиляй чи халкьдин зигьиндай Ватандин ЧIехи дяведин йисарин вакъиаяр, умуми гъалибвилик пай кутур ветеранар ва элкъвена хтун кьисмет тахьай аскерар садрани акъатдач.
Нариман Мамедов
