И йикъара ЦIийи Макьа Ватандин ЧIехи дяведин активный иштиракчи, Сталинграддин къати женгера телеф хьайи, Советрин Союздин Игитвилин тIвар гуниз къалурай куркIурхуьруьнви Къачаев Межид Къазиевичан тIвар хуьруьн са куьчедиз гуниз ва ам эбеди рикIера хуьнин кьул ачухуниз бахшнавай митинг кьиле фена. И мярекатдин майдандал хуьруьн агьалияр, дяведин игитдин багърияр, школьникар, Мегьарамдхуьруьн, Хив районрай, Дербентдай, Каспийскдай ва Махачкъаладай хтанвай гзаф кьадар мугьманар кIватI хьанвай.
Митинг хуьруьн кавха Асамудин Къазиагьмедова ачухна.
Махачкъаладай хтанвай республикадин вуздин преподаватель, илимрин кандидат, баркаллу игитдин стхадин хва Къачаев Зейнудина вичин имидин уьмуьрдин ва женгинин рекьикай суьгьбетна. Ада гьакIни Ватандин азадвал патал чанар гайи Межидан стхаяр тир Исрафилан ва Мурадан кьегьалвилерикайни малуматар гана. Инал игитдин гъвечIи стха Гьамидулагьа мярекатдиз кIватI хьайибуруз ва и кар гъиле кьуна кьиле тухвайбуруз вири Къачаеврин тухумдин патай сагърай лагьана.
Митингдал чи халкьарин игитвилерикай, гьар са хуьруьн жемятди гъалибвал патал гайи куьмекрикай Сулейман-Стальский райондин дяведин ва зегьметдин ветеранрин Советдин председатель Абдулакам Гьажимурадова, запасда авай полковник Масуб Магьмудова, хуьруьн агъсакъал, батмиш жезвай аял къутармишай, вири Россиядиз сейли хьайи Абдужамал Азизова ва маса ксари рикIел хкана. М.Къачаеван мемориалдин кьулунин вилик школадин аялри ватанпересвилин шиирар кIелна, чеб бубайрин ирсиниз вафалу тирдакай лагьана ва таза цуьквер эцигна.
“Квез, бубайрин рехъ давамарзавай, абурун игитвилерал дамахзавай ватанэгьлийриз, чухсагъул! Чун сад тирла, чи хура садавайни акъвазиз жедач! Яшамишрай Гъалибвилин югъ!” — лагьана дуствилин алакъаяр тайинариз атанвай Ленинградский областдин Тосновский райондин администрациядин кьилин заместитель Петр Семгина. Чнани гьа гафарал къул чIугвазва. Къуй чи жегьил несилни бубайрин баркаллу крариз, игитвилериз вафалу хьурай!
Мизамудин Магьмудов
