2015-йисан 15-майдиз КIири бубадин булахдал, тама яракьламиш хьанвай бандитрин дестеди КIирийрин хуьряй тир, Финский ва Ватандин ЧIехи дявейрин иштиракчи, Яру Гъед ордендин сагьиб Батманов Лукьманан велед, мешебеги Зейнудин яна кьенай.

Ам зазни хъсандиз чидай. 1973-йисуз КIирийрин юкьван школада муаллимвиле кIвалахдайла, Зейнудиназ гъвечIи классра тарс гун кьисмет хьана. Ам гзаф шад, уьмуьрдал рикI алай, рахадайла вилер хъуьредай зирек аял тир. Гуьгъуьнлай за райондин партийный ва советрин органра кIвалахдайла, чун са шумудра гьалтнай. Ада вичел буюрмишай гьар са кIвалах кьилиз акъудиз чалишмиш жедай, зегьметдал рикI алай кас яз къалурнай. Гьар ихтилат кватайла, ада вичин буба — фронтовик Лукьманан насигьатар рикIел хкидай, адал дяведин йисара гьалтай четинвилерикайни азиятрикай ихтилатардай.

Зейнудина куьрпе аял ва адан дидени буба хуьн патал вичин чан гана. Игитар гьамиша акьалтзавай несилриз чешне яз амукьда. Зейнудин чи гьукуматдин лап вини дережадин шабагьдиз лайихлу тирдал са шакни алач. Иншаллагь, гьакI женни ийида.

Фахрудин Мирзоев,
Кьурагь райондин ветеранринни пенсионеррин ва
агъсакъалрин Советдин председатель