Халкьарин садвилин юкъуз Мегьарамдхуьруьн районда Советрин Союздин Игит Абас Исрафиловаз бахшна азаддиз кьуршахар кьунай республикадин турнир кьиле тухвана. А.Исрафилован тIварунихъ галай 1-нумрадин ДЮСШ-да тешкилат “Спортди вири садзава!” лишандик квай и мярекатдиз Мегьарамдхуьруьн райондин кьил Фарид Агьмедов, Белиж посёлокдин кьил Рамиз Гьабибулаев ва маса ксар мугьман хьанвай. 

Гьар йисуз тухузвай и турнирда, адет хьанвайвал, Дагъустан ва Азербайжан республикайрай тир 200-далай гзаф спортсменри иштиракна.

Ф.Агьмедова районда спортдин хиле ийизвай кIвалах­ди­кай, жегьилрин арада сагълам уьмуьр раиж авун патал кьиле ту­хуз­вай спартакиадайрикай суьгьбетна.

— Дагъларин уьлкведин дамах, вичин тIвар эбеди авур, Ватан патал чан гайи кьегьал хциз бахшнавай и турнир 2008-йисалай башламишна датIана кьиле тухузва. Умудлу я, и турнир кьуршахар кьунал рикI алайбур патал итижлуди жеда. Спортсменар патал, им, гьелбетда, чпин алакьунар ахтармишдай мумкинвал я, — къейдна райондин кьили ва викIегьбур гъалиб хьун алхишна.

Р.Гьабибулаевани жегьилрик руьгь кутадай келимаяр лагьана ва А.Исрафилов хьтин кьегьал рухваяр акьалтзавай несилар патал чешне тирди къейдна.

Турнир башламишунин лишан яз уьлкведин пайдах Россиядин ва международный акъажунрин гъалибчи тир жегьил спортсмен М.Зин­гарова хкажна. “Мегьарамдхуьр” ансамблди ва Мегьарамдхуьруьн районда авай Россиядин халкьарин адетдин культурадин центрадин векилри концерт гана, турнир кьве юкъуз  давам хьана.

Дагъви Шериф

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя