Ял ядай багълар, рекьерни муькъвер къайдадиз хкун, спортдин майданар, социальный ва культурадин метлеб авай объектар эцигун — ибур Ахцегь райондин кьил Осман Абдулкеримова хайи район аваданлу авунин мураддалди кьиле тухузвай кIвалахрин тамам тушир сиягь я.
Ингье и мукьвара адан теклифдалди Хуьруьгрин хуьре край чирдай музей арадал гъанва. Гьеле алатай асирда эцигнавай дарамат (революциядилай виликан девирда ина хуьруьн мискIин, Советрин девирда туьквен авай) къайдадиз хкана. Музей арадал гъуник хуьруьнвийрини къуьн кутуна. Дараматдин зал са куьруь вахтунда ида-ада гъанвай экспонатрив ацIана.
Дагъустан Республикадин милли музейдин илимдин къуллугъчи Тазагуьл Мегьамедовади ва Ахцегь райондин край чирдай музейдин директор Агьмед Дагъларова цIийи музейдиз куьмекар гана. Абуру экспонатар чпиз тайинарнавай чкайрал эцигунин кIвалахра иштиракна. Музейдин залда яшайишдин алатар, къадим заманадин заргаррин гъилин шейэр ва парталар, къаб-къажах, музыкадин, зегьметдин алатар ва чпин агалкьунралди республикадилай къецепатани тIвар-ван акъатай машгьур хуьруьгвийрин шикилар ава. Абурун арада Дагъустандин халкьдин шаир Хуьруьг Тагьир, инженер-конструктор, Баренцево гьуьле мусибатдин гьалара телеф хьайи цин кIаникай фидай “Курск” гимидин экипаждин член Мамед Гьажиев, академик Эмирбег Эмирбегов, Дагъустан Республикадин лайихлу муаллим, мергьяматлувилин “Просвещение” фондунин президент Магьмуд Абдулкеримов, Дагъустандин лайихлу артист Эмирбег Эмирбегов ва хейлин масабур ава.
«Лезги Газет»
