13-августдиз Ахцегь райондин Къурукаларин хуьруьн тарихда берекатлу вакъиа хьана: и хуьруьнви Абдул Байрамалиева вичин хсуси такьатрихъ ва жемятдин куьмекдалди эцигай гуьзел мискIин ачухна. И юкъуз хуьре чIехи мавлид къурмишна, мубаракрай!
Бетондикайни керпичрикай винел элкъвей еке къубба ва 16 метрдин кьакьан минарани галаз 4-5 йисан вахтунда пара устадвилелди эцигнавай и гуьзел ибадатханада вишелай артух инсанар гьакьзава. Дишегьлийри капIдай махсус айван, кIвачин къапарни винелай алукIдай парталар хутIундай, ял ядай, гъилер чуьхуьн къачудай ва, герек тир маса вири чкаяр фикирда кьуна эцигнавай инаг, къайи ва чими ятаралди, хъуьтIуьз чимдай къурулушдалди, куьрелди, вири къулайвилералди таъмин я, машаллагь!
МискIиндин къенепатар девирдин истемишунривни мусурманрин хъсан адетрив кьадайвал кутугай тегьерда безетмишнава: къавукай гуьзел люстраяр куьрсарнава, чилел махсус халича экIянава, кьакьан цларал пешекар художник Мегьамедзериф Гьажиева Къуръандин аятар кхьенва.
Пакамалай башламишна вири хуьруьнвийризни мугьманриз ина, мискIиндин вижевайдаказ туькIуьрнавай къулай гьаятда, тIуьн-хъун гана…
— Гьуьрметуниз лайихлу Абдул стхади вичин рагьметлу Нисредин бубадин веси кьилиз акъудуналди хайи хуьре сифте яз мискIин эцигна, кардик кутунва. Гила Къурукаларин хуьрелни азандин ширин ван ала, мубаракрай! — хуш келимайралди ва мугьманар тебрикуналди, межлис Ахцегьрин жуьмя-мискIиндин имам, райондин имамрин советдин председатель Абдулашим гьажи Абдулгьашумова ачухна ва кьиле тухвана. Сифте гаф ада Дербент шегьердин кьилин мискIиндин имам Исамудин эфендидиз гана.
— Эгер инсанди туртурдин муг кьван гъвечIи мискIин эцигайтIа, Аллагь-Таалади адаз Женнетда чIехи дарамат эцигда лугьудай гьадис ава. Муькуь патахъай, мискIин лап къизилдикай эцигнавай багьади, гуьзелди хьайитIани, Аллагьдиз герекди аниз ибадат ийиз къвезвай инсанар, абурун рикIер тирди аннамишна кIанда. Аллагьди кьилди касдин ваъ, жемятдин капI хушдиз кьабулзавайвиляй мискIинар тебрикзава, хизанар, тухумар, тайифаярни халкьар халкьнава, жуьмядин юкъуз жемятдин кпIунин дережа хкажнава. Чна йикъа вадра авуна кIанзавай кпIуна Аллагьди цаварал малаикрин вири ибадатар (ана абур гьамиша садбур суждада, садбур, рукугьда ва икI мад) саднава. Артухлама, чаз Къуръан ганва. Адалатлу ва гъавурдик квай имам авай мискIинда (им кьилин шартI я) инсанар сад, гьуьрметлу, савадлу, адалатлу, мергьяматлу жезва. Къуй куь хуьре ислягьвили, гьуьрметди, берекатди ва халкьдин хушбахтвили агъавал авурай! — ялварна Исамудин гьажиди.
Къурукаларин жемятдин патай цIийи мискIиндин имам Керим Керимов рахана.
— МискIин патал чил маса къачунилай эгечIна къенин лишанлу йикъалди, чаз чида, еке зегьметар акьалтна Абдул стхадал. Гила чаз жемятдин кпIар, мавлидарни хийирлу маса межлисар кьиле тухудай вижевай чка хьанва. Аллагьди ганвай девлет халкьдин рекье харждай жумарт ксар къуй пара хьуй!
Мярекатдал гьакI Смугъулрин хуьруьн имам Сократ Гьашумов, Авадан хуьруьн имам Рафик Мамедов, калукви агъсакъал Салигь гьажи Салигьов, зегьметдин ветеран фийиви Гьидаят Насиров, Луткунрин хуьруьн имам Эмир СултIанбегов ва масабур рахана. Эхирдай гаф Абдул Байрамалиева къачуна: — Хуьре мискIин эцигна, чIехи мавлид авун — им заз рагьметлу Нисредин бубади тунвай веси тир. Фадлай ният авуна, уьмуьрдин макьсаддиз элкъвенвай эрзиман мурад, Аллагьдиз шукур хьуй, гила кьилиз акъатунал зун пара шад ва бубадин вилик уьзуьагъ я. Гьелбетда, им текдиз жедай кар туш. Эцигай устIарриз, чпин кьумекдин пай кутур калукви Абдулселим, Махачкъалада яшамиш жезвай Неби ва маса стхайриз, гьакI къенин межлисда иштиракзавай вирибуруз чухсагъул!
Дашдемир Шерифалиев
