Дагъустандин Кьилин везифаяр вахтуналди тамамарзавайди тир Владимир Васильева 10-октябрдиз Москвада терроризмдиз акси Милли комитетдин председатель, Россиядин ФСБ-дин директор Александр Бортникован регьбервилик кваз кьиле фейи НАК-дин заседанида иштиракна, хабар гузва РД-дин Кьилин ва Гьукуматдин Администрациядин пресс-къуллугъди.
Заседанидал Кеферпатан Кавказдин Федеральный округда терроризмдиз аксивал авунин кIвалах тешкилунин ва ам гужлу авунин месэлайриз килигна, гьакIни 2013-2018-йисара Россиядин Федерацияда терроризмдин идеологиядиз аксивал авунин Комплексный план кьилиз акъудзавай гьал веревирдна.
НАК-дин делилралди, къанун-къайда хуьдай къуватрин тайин мурадрихъ элкъуьрнавай гьерекатрин нетижада алай вахтунда Кеферпатан Кавказда террористрин активвал агъуз аватнавайди ачухдаказ аквазва. 2017-йисуз чIуру ниятар авай 20 десте хатасуз авуна, абурун иштиракчияр тир 120-далай гзаф ксарин, асул гьисабдай жегьилрин, чIуру кIвалахдин рехъ атIана. Террориствилин ва экстремиствилин материалар авай дуьздал акъуднавай ва чпин вилик пад кьунвай интернет-ресурсрин кьадар кьве сеферда артух хьанва. Виридалайни кар алайди вуч я лагьайтIа, вилик пад кьунин тайин тир кIвалах тухунин нетижада террориствилин гьерекатрикай къерех хьанвай ксарин кьадар пуд сеферда артух хьана.
Месэла гьялунин нетижайрал асаслу яз, терроризмдиз аксивал авунин рекьяй властдин органрин ва терроризмдиз акси комиссийрин кIвалах мадни хъсанарунин алава серенжемар кьилиз акъудунал фикир желбзавай къарарар кьабулна.
Кар алай терефар тайинарнава
10-октябрдиз Россиядин Минкавказда Дагъустан Республикадин Кьилин везифаяр вахтуналди тамамарзавайди тир Владимир Васильев Кеферпатан Кавказдин крарин рекьяй РФ-дин министр Лев Кузнецовахъ галаз гуьруьшмиш хьана. Идан гьакъиндай, Кеферпатан Кавказдин крарин рекьяй Россиядин министерстводин пресс-къуллугъдикай делил кьуналди, РД-дин Кьилин ва Гьукуматдин Администрациядин пресс-къуллугъди хабар гузва.
Гуьруьшда Кеферпатан Кавказдин крарин рекьяй РФ-дин министрдин сад лагьай заместитель Одес Байсултанова, Россиядин Федерациядин финансрин министерстводин бюджетрин алакъайрин Департаментдин директор Лариса Ерошкинади иштиракна.
Лев Кузнецова Владимир Васильеваз ам Дагъустанин Кьилин везифаяр вахтуналди тамамарзавайди яз тайинарун мубаракна, Россиядин Минкавказ региондин лап важиблу месэлаяр гьялунин карда вири жуьрейрин куьмекар гуз гьазур тирди къейдна.
Гуьруьшдин иштиракчийри “2025-йисалди Кеферпатан Кавказдин Федеральный округ вилик тухун” тIвар ганвай Россиядин Федерациядин государстводин программадик квай “2016-2025-йисара Дагъустан Республика яшайишдинни экономикадин жигьетдай вилик тухун” подпрограмма кьилиз акъудунин сергьятра аваз Россия яшайишдинни экономикадин жигьетдай еримлу авунин месэлаяр веревирдна.
Республикадин вилик акъвазнавай кар алай везифайрикай сад яз умуми образованидин идарайра пуд лагьай сменада тарсар гунал эхир эцигун чарасуз тирди къейдна. Гуьруьш кьиле фидай чIавуз здравоохраненидин объектар цIийикIа туькIуьр хъувунин, эцигунин, электроэнергетика, агьалийрин яшайишдин шартIар таъминардай къурулушар вилик тухунин рекьяй серенжемар, гьакIни гъилевай йисуз Дагъустан Республикадин инвестицийрин региональный проектар кьилиз акъудзавай гьал, 2018-йисан государстводин программадик кутадайвал инвестицийрин проектриз талукь заявкаяр веревирдна.
Республика вилик тухунин лап важиблу месэлайриз килигдай чIавуз Россиядин Минкавказдин стратегический проект кьилиз акъудзавай гьалдиз — Каспийдин транспортдинни логистикадин комплекс тешкилуниз кьетIен фикир гана. Одес Байсултанова и проектдихъ Дагъустан, санлай Кеферпатан Кавказдин федеральный округ яшайишдинни экономикадин жигьетдай вилик тухун патал еке метлеб авайди къейдна.
Министрдин сад лагьай заместителди малумарайвал, гьуьлуьн алай аямдин цIийи порт эцигуни Россиядин Федерацияди Каспий гьуьлуьн къерехда авай, Персидский заливдин уьлквейрихъ галаз алишверишдинни экономикадин рекьяй хуьзвай алакъаяр цIийи дережадиз акъудда.
РД-дин Администрациядин Кьилин ва Гьукуматдин пресс-къуллугъ
