Дагъустандин промышленностдин министерстводин пресс-къуллугъди хабар гайивал, республикадин меркезда кардик квай «Димитров Кабель» ООО-ди вирироссиядин «2017-йисуз Россиядин виридалайни хъсан 100 кархана» конкурсда «Промышленностдин хиле виридалайни хъсан кархана» номинациядай 1-чка кьуна. Гъалибчидив шабагь Москвада кьиле фейи международный «Инновацияр ва виликди фин» форумдин сергьятра аваз вахкана.

Малум хьайивал, «Димитров Кабель» ООО кабеларни симер арадал гъунал машгъул жезва. Карханада алай аямдин технологияр ава. ООО-ди СКФО-дин ва Россиядин са жерге шегьеррин базарар чпин продукциядалди таъминарзава.

Республикадин промышленность еримлу авунин кардик лайихлу пай кутунай карханадин кIвалах Дагъустандин промышленностдин министерстводи шабагь гуналди къейд авунай.

Шад жедай кар ам я хьи, «Димитров Кабель» ООО-дин кьиле акъвазнавайди чи кьегьал ватанэгьли Шагьпаз Асаханов я. Ада лезги чIал, меденият еримлу хьун патални вичелай алакьдай куьмекар гузва. Чна «Лезги газетдин» нумрайрикай сада хабар гайивал, къведай йисуз Сулейман-Стальский районда тешкилзавай Етим Эминан тIварунихъ галай конкурсриз пулдин такьатар чара ийизвайди Шагьпаз Асаханов я. 2018-йис патал лагьайтIа, и баркаллу хци вичин патай 25 хуьруьнвидиз (адан бине Сулейман-Стальский райондин Эминхуьр я) «Лезги газет» кхьенва.

Чаз чи газетдин амадагдихъ чандин сагъвал ва кIвалахдин рекье мадни еке агалкьунар хьана кIанзава.

«Лезги газет»

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя