Хъсанбурун жергеда

И мукьвара Махачкъалада республикадин клинический азарханадин (центральный азархана) кьилин духтур  Ибрагьим  Мегьамедов  республикадин СМИ-рин векилрихъ галаз гуьруьшмиш хьана. Ада Дагъларин уьлкведин агьалийрин сагъламвилин къаравулда акъвазнавай еке идарайрикай сад тир РКБ-дин кIвалахдикай, эхиримжи 5 йисан вахтунда ина начагъбур патал тешкилиз алакьнавай къулайвилерикай, ина алай аямдин технологияр ишлемишуналди кьиле тухузвай кьетIен жуьредин операцийрикай, гележегдин планрикай, гьа гьисабдай яз мукьвал вахтара РКБ-дин гьаятда Россиядин Кьиблепата сад лагьайди яз ачухдай “гамма-чукIул” аппаратдалди сагъардай лучевой терапиядин ва лучевой диагностикадин центрадикай ва икI мад суьгьбетна.

Идарадин регьберди алатай йисан эхирра РКБ (республикадин клинический азархана), гьакIни РДЦ (республикадин диагностикадин центр) ва  республикадин сагъламвал мягькемардай центр  (грязелечебница) Санкт-Петербургдин социальный статистикадин центрадин ахтармишунрин нетижайрай Россиядин виридалайни хъсан медидарайрин сиягьда гьатнавайдини малумарна. Ихьтин къимет медицинадин идарайриз эхиримжи 5 йисан ва вири хилерай кьиле тухванвай кIвалах фикирда кьуналди ганва. ИкI, азаррин диагностикадай ва азарар сагъарунай къазанмишнавай агалкьунрай, инновационный технологияр ишлемишунай Дагъустандин медидарайриз абур “Россияда медицинадин ва здравоохраненидин хиляй виридалайни хъсан идара” Вирироссиядин милли премиядин лауреатрин официальный реестрдик кутунвайвилин гьакъиндай дипломар ва сертификатар ганва. Виридалайни хъсанбурун жергедик Москвадин, Подмосковьедин, Грозныйдин, Евпаториядин, Таганрогдин, Читадин, Дондал алай Ростовдин, Пятигорск­дин ва Анападин азарханаярни акатнава.

Ибрагьим Мегьамедова авур суьгьбетдай малум хьайивал, алай вахтунда РКБ-да 500-далай виниз духтурар ва  саки 1000-дав агакьна медсестраяр начагъбурун сагъламвилин къаравулда акъвазнава. Вири санлай йиса лагьайтIа, ина 100 агъзурдав агакьна агьалийрив медицинадин куьмек агакьзава (ина кардик квай стационарда чеб сагъарзавайбур, поликлиникадиз къвезвайбур ва гьар юкъуз “приёмный покойдиз” агакьарзавайбурни кваз), чпин сагъламвал мягькемарун патал Кеферпатан Кавказдин къунши регионарайни агьалияр къвезва. Малум хьайивал, РКБ-да лап виниз тир дережадин технологийрикай менфят къачуналди 15 жуьредай, гьа гьисабдай яз гематологиядай, неонатологиядай, рикIинни дамаррин хирургиядай, онкологиядай, травматологиядай-ортопедиядайни  медицинадин куьмек агакьарзава.

Кьилин духтурди “гамма-чукIул” аппаратдикайни галай-галайвал суьгьбетна. Малум хьайивал, РКБ-ди ва республикадин бюджетдай такьатар чара авуналди центрадин дарамат эцигнава, къенепата ремонтдин кIвалахар тамамарзава. “Гамма-чукIул” аппарат эцигдай инвесторни жагъанва. Сифтегьан азарлуяр алай йисан юкьвариз кьабулун пландик ква. Алай вахтунда Россияда ихьтин аппаратар вири 4 ава. “Гамма-чукIул” аппаратдин куьмек­далди операция авун (кьилин гьисабдай яз, адакай менфят къачу­налди, дакIунвай чкаяр атIуда) патал наркоз гун герек къвезвач.

— Къенин юкъуз винидихъ къалурнавай лап виниз тир дережадин куьмек къачун патал дагъустанвияр Россиядин маса регионриз фин герек жезва.  Малум тирвал, абуруз и кар лап багьаз акъваззава, медицинадин куьмек вични ужузди туш, мадни рекьер-хуьлеризни са кьадар пулар харж авуна кIан жезва. И крар фикирда кьуналди чаз республикада и жуьредин куьмекар агакьардай центр эцигун ва кардик кутун хъсан яз акуна, йиса лагьайтIа, и аппаратдин куьмекдалди 2 агъзур кас сагъардай, идалди неинки Дагъустандин, гьакI Кеферпатан Кавказдин вири регионрин агьалийризни куьмекар гудай мумкинвал жеда, — къейдна И.Мегьамедова.

Ихьтин мярекатрал адет хьанвайвал, журналистри республикада медкадрияр гьазурунин еридиз, РКБ-дин азад вакансийриз, азарханадин медперсоналдин пешекарвилин гьазурлухвилин дережадиз талукь суаларни гана. РКБ-дин регьберди галай-галайвал жавабар агакьарна.

Рагнеда Рамалданова