Мегьарамдхуьруьн райондин  администрациядин  пресс-къуллугъди хабар гузвайвал, 3-августдиз  Мегьарамдхуьруьн райондин администрациядин заседанийрин залда  РД-дин Гьукуматдин Председателдин Сад лагьай заместитель Рамазан Алиеван регьбервилик кваз  совещание кьиле тухвана. Ам муниципалитетда РД вилик тухунин кар алай проектар кьилиз акъудзавай гьалдиз талукьарнавайди тир.

Совещанида  РД-дин Кьилин ва Гьукуматдин Администрациядин проектрин кIвалах тешкилдай управленидин начальникдин заместитель Мусалан Тахманова, РД-дин хуьруьн майишатдин министерстводин проектрин бинедаллаз вилик тухунин, инвестиционный политикадин рекьяй отделдин начальник Мегьамед Патагьова, РД-дин экономикадин ва со­циаль­ный жигьетдай вилик финин министерстводин финансрин, налогрин политикадин, проектрин бинедаллаз идара авунин отделдин начальник Шамил Исмаилова, РД-дин Кьилин ва Гьукуматдин Администрациядин проектрин кIвалах тешкилунин  управленидин  консультант Эльвира Къараевади, муниципальный райондин администрациядин жавабдар работникри, хуьрерин кьилери, райондин жуьреба-жуьре  къуллугърин ва ведомствойрин регьеберри иштиракна.

Мугьманар тебрик авурдалай гуьгъуьниз, Мегьарамдхуьруьн райондин кьил Фарид Агьмедова кIватI хьанвайбур район яшайишдин ва экономикадин жигьетдай вилик финин еришдихъ галаз куьрелди танишарна.

РД-дин Гьукуматдин Председателдин Сад лагьай заместитель Рамазан Алиева проектрин бинедаллаз идара авунин кIвалах гужлу авуниз республикадин Кьил Рамазан Абдулатипова кьетIен фикир гузвайди къейдна. Лагьана кIанда хьи, кар алай проектар уьмуьрдиз кечирмишунин ва абур кьилиз акъудунал Рамазан Абдулатипова кIевелай гуьзчивал авунин нетижада Дагъустан, кьуд йисан делилри­ къалурзавайвал, хъсан ериш аваз вилик физвай регионрин жергедик акатнава.

Рамазан Алиев  Дагъустандин меркезда агалкьунралди кьилиз акъудзавай проектрални акъвазна. Ингье абур: “Хатасуз, ерилу рекьер”, “ЖКХ ва шегьердин шартIар”, “Дагъустан  проектралди вилик тухунин барадай  кIвенкIве ава”.  Экономика  “лацуди” авун, “Вилик фидай чкаяр, инвестицияр ва территорияр нетижалудаказ  еримлу авун”, “ЦIийи индустриализация”, “Государстводи нетижалудаказ идара авун” кар алай проектар кьилиз акъудунин барадай муниципалитетди тухузвай кIвалахдикай райондин администрациядин кьилин заместитель Ариф Гьажиева суьгьбетна. Ада район яшайишдинни экономикадин рекьяй хъсан ериш аваз вилик физвайди къейдна. ИкI, 2016-йисуз муниципальный райондин сад авунвай  бюджетдин доходар, 2015-йисав гекъигайла, 21,4 % процентдин артух хьана. Гъи­левай йисан 1-июлдалди план и бара­дай  50,5 % кьилиз акъудна.  Докладчиди чиле­рин ва капитальный эцигунрин объектрин инвентаризация тухунин жигьетдай кьилиз акъудзавай кIвалахдикайни суьгьбетна. Райондин вири 22 хуьрени  куьчейрин адресар тайинарунин кIвалах акьал­тIар­нава, 659 куьчедин тIварар ФИАС тIвар алай системадик кутунва.

Ариф Гьажиева  регистрация тавуна кIвалахзавайбур налогрин рекьяй учетда  тунин барадай махсус дестейри тухузвай кIвалахдикайни суьгьбетна.

Кар алай “Нетижалу АПК” проект кьилиз акъудунин жигьетдай районда тешкилнавай кIвалахдикай муниципальный райондин администрациядин кьилин сад лагьай заместитель Гьабибуллагь Мурадалиева суьгьбетна. Малум тирвал, Мегьарамдхуьруьн райондин экономикадин асул хилер багъманчивал ва уьзуьмчивал я. Докладчиди  районда 2016-йисуз  40 агъзур­ тонн емишар гьасилайди, идани республи­када санлай гьасилай емишрин 26 процент тешкилзавайди къейдна, гьакIни  экономикадин амай хилер вилик тухун патал кьабулзавай серенжемрикайни лагьана.

Кар алай  “Хатасуз Дагъустан” проектдиз талукь яз совещанидал  муниципальный райондин администрациядин кьилин заместитель Зайнудин Азимов рахана. Ада и рекьяй вири кIвалах республикадин  терроризмдиз акси комиссиядин АТК  аппаратдихъ галаз сих алакъада аваз тухузвайди ва идан макьсадни  районда гьалар мягькембур яз хуьникай ибарат тирди къейдна.

Гуьгъуьнлай совещанидал рахай муниципальный райондин администрациядин кьилин заместитель Марта Абдуллаева  райондин территорияда “Инсанвилин капитал” кар алай проектдин сергьятра аваз тухванвай кIвалахдал акъвазна ва ада и барадай тайин тир делиларни гъана­.

Гуьруьшдин эхирдай   Рамазан Алиева  райондин экономикадин  хилер вилик финин еришар, санлай къачурла, хъсанбур тирди къейдна, гьа са вахтунда ам фи­кир хгана кIанзавай са жерге месэлайрални акъвазна.

Райондин кьил Фарид Агьмедова  итижлу гуьруьш  кьиле тухунай мугьманриз сагърай лагьана.

«Лезги газет»

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя