Хайи чилел гьейранвиликай

“Мулдин цуьквер”. Гьа ихьтин тIвар алаз Ленинграддин областдин Гатчина шегьердин 2-нумрадин юкьван школадин урус чIа­ланни литературадин муаллим, дуь­ньядин литературадай ва риторитикадай тарсар гузвай филологиядин магистр, филолог-муаллимрин кафедрадин регьбер, РФ-дин Президентдин грантдин, Ленинграддин областдин губернатордин шабагьрин сагьиб, кьилин дережадин ­муаллим  Гуьзеля  Юзбеговна  Гьаса­новадин  сад лагьай ктаб чапдай акъатнава. Са шумуд цIуд йисан яратмишунрин бегьер.

Гуьзеля Юзбеговнади гьеле мектебда амаз шиирар теснифзавай. КIелунрал, чIаларал рикI алай руш Дагъустандин госпедуниверситетдин филологиядин факультетдикни экечIна. Диплом къачур пешекар Ленинграддин областдиз акъат­на. Гьикьван четинвилер ацалт­на­тIани, лезги руша вичиз урус чIални, литературани, педагогвилин сирерни бес кьадарда чизвайди субутарна, неинки школадин коллективдиз, классда кIелзавай­бу­руз, гьакI ди­де­­-бубайриз, шегьердин, областдин вилик-кьилик квайбурузни гьа­къисагъ зегьметчи, виниз тир дережадин чирвилер, алакьунар, бажарагъ авай пешекар, педагог тирди тестикьарна. Чи ваха вичиз лайихлу гьуьрмет къазанмишнава. Сагърай вич!

Ватандин къадир патаз акъатайла чир жеда лугьун кьуру гафар туш. И кар Гьасановади лап кIеве­лай кьатIанва. Гьавиляй ватандихъ адан рикI гьамиша кузва ва гьар гатуз ам хайи макандизни хквезва, хизанни галаз. Ктабдин кьуд паюникай гьа сифтегьандаз “Гьейран я вал, хайи чил” тIвар гунни дуьшуьшдин кар туш. “Самурдин та­мун булахар”, “Мулдин цуьквер”, “Гатфар”, “Заз кIандай зулун береда…”, “Шарвилидин суварик”, “Хтанва мад хайи чилел”, “Лезгистандин иер рушар”  шииррай ватандихъ авай цIигелвални, адал кьарувални, жуванбур кIан хьунни, багъри маканар, утагъар аваданлу хьунин мурадни аквазва.

“Вири алем гана заз” паюна ша­ирдин къелемдикай хкатнавай лирикадин эсерар гьатнава. Филолог­ди вичин алакьунар прозадани ахтармишзава. “Бармак вилериз ават тавурай”, “Кьисметдин ре­кьер”­, “ЦIийи адет” гьикаяйра чи хуьрерин агьалийрин гьакъикъи уьмуьр, адетар къалурзава.

Ктабда Г.Гьасановади урус чIа­лал кхьенвай шииррини хейлин чка кьунва. Мубаракрай чи вахаз сифте чубарук.

Къейд ийиз кIанзава хьи, “Мулдин цуьквер” “Мавел” чапханада яратмишунардайбурун “Булах” кIватIалдин фондунин гьисабдай акъуднава. Къведай йисуз и фондуни Гуьлжагьан Мисрихановадин ва жаван шаиррин уртах ктабар акъуддайвал я.

Хийир Эмиров