Грипп хаталу я: саймазвалмир!

Са шумуд югъ идалай вилик Ахцегь райадминистрациядин кьилин заместитель Алмас Шуаеван регьбервилик кваз 2017-2018-йисарин эпидсезондиз гриппдин ва распираторный вирусдин (ОРВ) азаррин вилик пад кьунин серенжемриз талукь месэладай махсус совещание кьиле тухвана.

 

Ðîññèÿ. Êóðãàí. Â îäíîé èç áîëüíèö ãîðîäà. Ôîòî ÈÒÀÐ-ÒÀÑÑ/ Àëåêñàíäð Àëïàòêèí

Адан кIвалахда  Ах­цегь, Докъузпара  ва Рутул районра Роспотребнадзордин кьилин духтур Арсен Касимова,  райветуправленидин кьилин духтур Зиядхан Керимова, райбольницадин (ЦРБ) инфекцийрин отделенидин заведующий  Лейла Ширинбеговади,  РУО-да кьилин пешекар Молла Агъаева ва жавабдар маса къуллугъчийри  иштиракна.

— Гьуьрметлу юлдашар, РД-дин кьилин санитарный духтур Элеонора Омариевадин 2017-йисан 31-августдиз кьабулнавай 52-нумрадин къарардал асаслу яз, республикадин вири муниципалитетра грипп­дин ва ОРВ-дин вилик пад вахтунда кьуниз талукь тир серенжемар кьабулунин патахъай тагькимарнава. Кьилди къачуртIа, хъуьтIуьн бе­реда  образованидин, культурадин, медицинадин ва яшайишдин маса идарайра чимивилинни михьивилин къайдайрал амал авун таъминарунин, гьич тахьайтIа, 40 процент районэгьлийриз гриппдиз акси рапар ягъунин чара­суз­вал ава, — башламишна вичин суьгьбет Алмас Ис­маиловича.

— Грипп — им садакай-садак акатдай гзаф хаталу азар я. Вилик пад вах­тунда кьун тавуртIа, ада нер­вий­­­­рин къурулушдиз, япариз, ри­кIиз, жигерриз ва бедендин кар алай маса органриз пис таъсирзава, — лагьана  Арсен Касимова. — Грипп­дин­ни ОРВ-дин азарри, адет яз, ме­кьи береда кьил хкажзава ва, къайгъусузвал авуна, яцIа гьатай­тIа, абурухъ галаз женг чIугун лап четин жез­ва. Месела, шаз хъуьтIуьн варцара чи уьлкведа  грипп акатай 500 агъзур кас ажалдин къармахрай ахкъудиз хьанач. Профилактикадин лап хъсан серенжем — иллаки къурхулувилин дестедик акатзавай ксариз (аялриз, яшар 60 йисалай алатнавай хронический (яни яргъалди сагъар техжезвай) азарар квай ксариз, гриппдиз акси рапар вахтунда яна кIанда. Алатай йисарилай тафаватлу яз, гила Россияда акъудзавай ерилу вакцинайрикай менфят къачуз жезва. Шаз планламишнавай 9600 кас районэгьлийриз рапар ягъиз алакьуникди грипп кьезилдиз алатна. ЦIи чна районда 10300  агьа­лидиз рапар ягъун планла­миш­нава. Гьа ихьтин серенжемар чна чи гуьзчивилик квай къунши районрани кьиле тухузва. Гьелелиг районда грипп квай азарлуяр регистрация авунвач, амма им абур ер­ли авач лагьай чIал туш. Гьа­йиф хьи, дагъвияр анжах кIеве гьатайла духтурдин кьилив къведа.

Лейла Ширинбеговадини къейд авурвал, и жигьетдай районда гьалар пайгар ятIани, гьазурвал аквазва: гриппдин профилактикадин мах­сус план-график туькIуьрнава; рапар ягъун патал духтуррин 24 бри­гада тешкилнава; шазан запас­ди­кай яз, тахминан 40% аялриз ядай вакцина ава ва и йикъара мадни дарманар хкида.

“Четинди, дуьз гъавурда авачиз, гьукуматдин пулсуздаказ тир и къуллугъдикай хейлинбуру гьар жуьре багьнайралди кьил къа­къудун я. Гьавиляй алай вах­тун­да чун, чкайрал физ, гьакI газетрин ва чкадин телевиденидинни сайтдин куьмекдалди инсанар гъавурдик кутаз алахънава”, — лагьана Л.Ширинбеговади.

Мярекатдал масабурни рахана ва умуми къуватралди районда гриппдин вилик пад кьунин чарасуз серенжемрин сиягь веревирдна.

«Лезги Газет»