ГьикI я гьалар, азарлуяр?

Мукьвара са азарлудал кьил чIугваз зун Ахцегьрин райбольницадиз терапиядин отделенидиз фен­вай. Михьи, экуь палатада са шумуд­ кас азарлуяр авай.

Аллагьдиз шукур хьуй, абурун начагъвилер заланбур тушир. Салам-каламдилай кьулухъ чи арада азарлуйрин гьал-агьвалдикай, духтурар абуруз килигзавай тегьердикай ва яшайишдин гьар жуьре месэлайрикай суьгьбетар кватна­.

— Чал гьалтнавай ихьтин девирдиз килигайла, Аллагьдиз шукур, гьалар пис туш, — башламишна­ ви­чин­ ихтилат чепиви Эльдар Адильханова. Малум хьайивал, 75 йисан яшда авай агъса­къалди вичин вахтунда хипехъанвал, 22 йисуз хуьруьн К.Марксан тIва­рунихъ галай колхоздин складчивал, хуьруьн биб­лиотекарвал авуна. — 2-3 югъ я, зун, хондрозри тади гуз, боль­ни­ца­диз атана. Пара кьадар сагърай, Алихано­ва Садаф духтурди ви­ч­е­лай алакьдай куьмекар авуна, са бу­бат кIвачел ахкьалтнава. Дегь­­лизар, палатаярни, аквазва хьи, ­ми­хьи­ — ла­цу я. Кьилинди, духтурар, мед­­­сес­тра­яр, санитаркаяр азар­­луй­рив мергьяматлувилелди эгечI­­­­зава­­­.

—  ТIуьн-хъунин, дарманрин патахъай вуч лугьуз жеда?

—  Ина йикъа кьвед-пудра хъсан, тIямлу тIуьнар гузва. Гьайиф хьи, герек вири дарманар авач. Месела, накь за  аптекадай 1260 манатдин дарманар къачуна.

— Зунни чепиви я, анжах Махачкъалада яшамиш жезва, — суьгьбетзава патав гвай койкадал къатканвай Саид Абдулжалилова. — Же­гьил­ чIавуз чандал пара гуж акьалтна: хуьре яргъал йисара чубанвал, Сухокумскда буругъчивал, Махачкъалада устIарвал ­авуна. Микроин­сультдиз дурум гана, гила 78 йисан яш хьанвайлани, вердиш хьанвай тегьер я, гъиле са кIвалах авачиз кьарай къведач. Хизандин чIа­лаз килиг тавуна, гатун береда хайи хуьре бу­бай­рин куьгьне кIвал туьхкIуьр хъийиз хтана. КIвал къайдадиз хкана, анжах жув больницадиз аватна.

Ярали духтурди сагъарзава, ЦРБ-дин кьилин духтур Мери Исмаиловади, йикъа садра-кьведра азарлуйрал кьил чIугваз, гуьзчивалзава. Хиве кьан, хуьруьн чкада медицинадин къуллугъ хъсанариз алахъунал зун шад я. Анжах, больницадин дарамат вич чкIидай хаталу гьалда ава. ЦРБ-дин яргъал фенвай эцигунриз элкъвенвай цIийи дарамат бегьемариз хьанай­тIа ажеб хъсан тир.

И палатада чна Рутул райондин Агъа КIатIрухърин хуьряй тир агъсакъал Аликбер Эмировахъ галазни суьгьбетна.

— Гьелбетда, Рутулани больница ава, амма нервийрин азарар Ах­цегьа Алиханова Садаф духтурди­ хъсандиз сагъарзава ла­гьана ван хьайила, иниз атана. ГъалатI хьа­нач. Гила гьал хъсан я: кьилин тIа­-лар­ амач, кIвачерин, кпулрин тIа­ларни кьезил хьана, къекъвез ­жез-ва, — разивилелди ­лугьузва уьмуьр­­лух хуьре чубанвал авур, 81 йисан яшда авай итимди.

Дашдемир Шерифалиев