Мукьвара Краснодарский крайдин Динской райондин Нововеличковская станицада яшамиш жезвай Кьурагь райондин Гелхенрин хуьряй тир Ражидин ва Бесхалум Гьуьсейноврин хва Рамазанакай спортдин путар хкажунин жуьредай, 19-22 йисарин яшдин жаванрин арада Европадин чемпион хьана.
Бягьсер 13-15 майдиз Латвиядин Даугавпилс шегьерда кьиле фена. Р.Гьуьсейнова тайинарнавай 10 декьикьадин вахтунда 32 килограммдин кьве пут 72 сеферда, рум гуз, хкажна. Им 73 кг-далди заланвал авай спортсменри къалурай виниз тир нетижа хьана.
Путар хкажунай командайрин арада кIвенкIвечивал патал кьиле фейи бягьсера Россиядин командади гъалибвал къазанмишна. Гьа икI, Рамазан Гьуьсейнова Европадай къизилдин кьве медаль хкана ва адаз «Международный классдин спортдин мастер» тIвар гана.
«http://gazeta-rvs.ru/» сайтдин делилралди, Рамазан Гьуьсейнов Динской районда путар хкажунин жуьредай международный классдин спортдин мастердин тIварцIиз лайихлу хьанвай сад лагьай кас я. Ада гъалибвал къазанмишнавай дисциплина путар хкажунин жуьреда виридалайни четинбурукай сад яз гьисабзава.
Лагьана кIанда, Рамазан фадлай спортдал машгъул жезва. 10 йисавай жаван яз ам кьуршахар кьунай чирвилер гудай секциядиз физ гатIунна. ГьикI ятIани са сеферда, тренировкайрин вахтунда, адан кIвач хана. РикIе къаст авай жегьил спортдивай къерех хьанач, ам путар хкажунай кардик квай секциядиз фена.
Са кьадар вахт арадай фейила, адакай путар хкажунай райондин чемпион хьана. 2012-йисуз Р.Гьуьсейнова 15-16 йисарин яшда авай жегьилрин арада Краснодарский крайдин кIвенкIвечивал патал кьиле фейи бягьсера 1- чка кьуна. 2013-йисуз Краснодарский крайдин кьилин приз патал тешкилай акъажунра ва Сургут шегьерда кьиле фейи Россиядин чемпионатда ам 1- чкайриз лайихлу хьана. Гьа и вахтунда викIегь пагьливандиз «Россиядин спортдин мастер» тIварни гана. 2015-йисуз ва 2017-йисара Россиядин кIвенкIвечивал патал кьиле фейи бягьсерани 1-чкаяр гелхенвидин кьисметдиз атана.
Алай вахтунда Рамазана КУБГАУ-дин юридический факультетдин 2- курсуна кIелзава ва Краснодарский крайдин гиревой спортдин федерациядин президент, тренер Юрий Танаеван рагьбервилик кваз лигим хьун давамарзава. Р.Гьуьсейнов Кубанда чIехи хьанатIани, са гъалатIни, маса чIаларин гафар квачиз, михьи лезги чIалал рахазва. Ам гьар йисуз гатун каникулрин вахтунда имийрал, халуйрал, Рамазан бубадал кьил чIугваз вичин гъвечIи Ватандиз хквезва. Белки хайи хуьр адан руьгь лигимзавай чад я жеди!
Сейфудин Шагьпазов
