Гъалибчи къаршиламишна

Алатай йисан эхиримжи юкъуз­ Лас-Вегасда UFS 219 турнирда гъалибвал къазанмишай дагъустанви пагьливан Хабиб Нурмегьамедов  Махачкъаладин аэропортуна агъзурдав агакьна ватандашри къаршиламишна.

Къейд ийин, кар алай ММА-лигада вичин 9-бягьсина Хабибаз бразилви Эдсон Барбозе кумукьна. Бягьс вичиз чара авунвай вири пуд раунддани давам хьана ва гьар са легьзедал Хабиба гуьзчивал тухузвай.

Бягьсинилай кьулухъ Х.Нурмегьамедова вич вахтуналди тир чемпион Тони Фергюсонахъ ва кьезил заланвал авайбурун дивизиондин чемпионвилин чIулунин сагьиб Конор Макгрегорахъ галаз ккIиз гьазур тирдакай малумарна.

Хабиб вичин винел гъалибвал къачуз тун тавунвай пагьливан яз амукьзава. Адахъ 25 гъалибвал хьанва.

Меркездин аэропортуна Х.Нурмегьамедов Дагъустандин физический культурадин ва спортдин министерстводин векилри, мукьва-кьилийри, гзаф кьадар дустарини болельщикри къаршиламишна. Хабиб вич къаршиламишзавайбурун юкьва гьатайла, инал митинг кьиле фена.

Хабибан буба Абдулманап Нурмегьамедован гафаралди хцин бягьс UFS 219 турнирда ви­ридалайни хъсанди, итижлуди яз гьисабна ва гила ам Тони Фергюсонахъ галаз экъечI­­­н­а кIанза­вайди лагьана.

Х.Нурмегьамедова малумарайвал, UFS-дин къведай бягьс гатфарихъ жеда.

— И бягьс планламишнавайвал кьиле фена. Сифтеди яз кIва­лахун зи месэла тир. Жу­ва-жув хъсан гьиссзава. Къведай бягьс, мумкин я, апрелдиз ва я майдиз кьиле фи­да ва, фикирзава, ам Тони Фер­­гюсонахъ галаз жеда. ИкI хьун мумкин я, эгер Тони ва Конор сад-садахъ галаз экъечI та­вур­тIа. Виридаз кIан­зава за абурун арада гъалибчи гуьзетун, заз гуьзетиз кIан­завач, заз бягьс кIанзава, — лагьана Хабиб Нурмегьамедова.

Дагъви Шериф