11-июндиз Мегьарамдхуьруьн райондиз РД-дин Гьукуматдин Председателдин заместитель Екатерина Толстикова мугьман хьана. Идакай Мегьарамдхуьруьн райондин администрациядин «Инстаграм»-да авай официальный чини хабар гузва.

Екатерина Толстикова райондин администрациядин кьилин сад лагьай заместитель Гьабибуллагь Мурадалиевахъ ва делегациядихъ галаз санал хсуси инвестор Фридон Шагьпазован такьатрихъ Билбил-Къазмайрал ва Приморскда эцигзавай мектебрин дараматриз килигиз фена. Объектрихъ галаз мукьувай таниш хьайидалай кьулухъ Екатерина Толстиковади совещание кьиле тухвана. Чешмеди хабар гузвайвал, ана РД-дин образованидин ва илимдин министерстводин, Мегьарамдхуьруьн райондин администрациядин векилри, инвестор Фридон Шагьпазова, винидихъ тIварар кьур хуьрерин мектебрин директорри ва масабуру иштиракна.

Екатерина Толстиковади къейд авурвал, цIийи кьве мектебни ишлемишиз вахкун патал, сифте нубатда, и идарайриз талукь документар РФ-дин законодательстводихъ галаз кьун лазим я. Ам мектебрихъ галаз алакъалу вири документриз килигна. «Юридический рекьяй ихтиярар авачир (юридически правовые) документар галачиз мектебар ишлемишиз вахкуз жедач», — лагьана РД-дин Гьукуматдин Председателдин заместителди.

Райондин администрациядин кьилин сад лагьай заместитель Гьабибуллагь Мурадалиева къейд авурвал, райондин мулкарал яшайишдин рекьяй еке метлеб авай объектар, мектебар, ясли-бахчаяр, больницаяр пайда хьун администрацияди хушдиз кьабулзава ва руководство и месэлайра куьмекар гузни гьазур я. Анжах вири къанун-къайдадин сергьятра аваз тешкилун герек я.

Инвестор Фридон Шагьпазован гафарай малум хьайивал, эгер госбюджетдай 125 миллион манат пул чара авуртIа, адавай 1-сентябрдалди кьве мектебни ишлемишиз вахкуз жеда.

Месэла веревирд авурдалай ва вири документриз килигайдалай кьулухъ Е.Толстиковади къейд авурвал, къведай гьафтедин жуьмядиз и месэладай РД-дин эцигунрин, архитектурадин ва яшайишдинни коммунальный майишатдин министерстода махсус совещание тешкилда.

«Лезги газет»