Беглерхан вири уьмуьрда колхоздин тракторист тир. КIва­лахдални рикI алай. Вичин везифайрив намуслувилелди эге­чIиз, планарни вахтунда ва артухни алаз тамамариз акурла, колхоздин правленидин къарардалди адав, ДТ-трактор вахчуна, ЭС-маркадин цIийи къуватлу трактор вугана. Гьелбетда, адаз вичин “шив” бегенмишни хьана.

КIвале лагьайтIа, ам уьмуьр­дилай нарази яз амай. Юргъун хьана кIвализ хтайла, кIандайвал къулай тахьайла, адаз хъел къведай. Гьа иниз килигна кIвале мукьвал-мукьвал къайи ихтилатар, къал-къиж жедай.

Жегьил чIавуз итимди са артух дарихвалдачир. Гьалар хъсан патахъ дегиш жедайдак адан умуд квай.

Садра итимди вичин наразивал къалурайла, папа адахъ галаз цаз алай рахунрик кьил ку­ту­на­:

— КичIезмач заз гила вакай. Аялар чIехи хьанва, зи дувулар деринриз фенва, — чиниз экъечIна паб.

Къапарай акъатна, вичивай вич хуьз тежезвай папан рахунриз яб гана, Беглерхана ажайиб жуьредин жаваб ахгакьарна: Де­ринриз фенвай дувулар чIва­рахарни галаз кIаняй акъуддай ЭС-маркадин тракторарни авайди рикIелай ракъурмир!

Итимдин жавабди паб къарсурна, ам, вуч хълагьдатIа чин тийиз, фикирри яргъариз акъудна…

Азедин Эсетов