Путар хкажунай Дагъустан Республикада ва Россияда къуватлу ва машгьур спортсменрикай сад тир Эмин Ибрагьимовахъ (шикилда) галаз зун 2008-йисуз къадим Ахцегьа лезгийрин къагьриманвилин “Шарвили” эпосдин сувар тухудайла мукьувай таниш хьанай. Ада а чIавуз путар хкажунай акъажунра 1-чка кьунай. Гуьгъуьнлай Эмина ихьтин агалкьун мад 5 сеферда къазанмишна. Алай йисузни ада “Шарвилидин” суварик спортдин и жуьредай 1-чка кьуна ва 70 кг-дин пут са гъиливди пуд сеферда хкажуналди, вичи эцигай Дагъустан Республикадин рекорд тикрар хъувуна.
Эмин Ибрагьимов 1959-йисуз Докъузпара райондин Мискиска дидедиз хьана. Ада хуьруьн юкьван школа, 1982-йисузни Новочеркасск шегьердин мелиорациядин институт акьалтIарна, са шумуд йисуз РД-дин мелиорациядин министерствода кIвалахна. Институтда кIелдай йисара чи ватандаш грекринни римлуйрин къайдада кьуршахар кьунал (ам и жуьредай спортдин мастервиле кандидат я) ва путар хкажунал рикIивай машгъул хьана. Спортдин эхиримжи жуьредай ада иллаки хъсан нетижаяр къазанмишна. ИкI, 1988-йисуз ада Советрин Союздин чемпионатда 5-чка кьуна, ам 5 сеферда Дагъустандин, 2 сеферда Россиядин, “Богатыри России” турнирдин, 3 сеферда ветеранрин арада Россиядин чемпион я. Ада Вирироссиядин турнирра гъалибвилер къачуна, путар хкажунай са шумуд рекорд эцигна. ИкI, 32 килограммдин кьве пут 1 декьикьада 35 сеферда хкажунай Россиядин рекорд эцигайди чи кьегьал хва я.
Э. Ибрагьимова 1996-йисалай Махачкъалада “Труд” стадиондал тренер яз кIвалахзава, гьа са вахтунда вичи турнирра иштиракунни давамарзава.
Эмин Ибрагьимован хва Эльмарни путар хкажунай ва залан атлетикадай РФ-дин спортдин мастер я. Алатай йисуз Ахцегьа “Шарвили” эпосдин суварик путар хкажунай гъалиб хьайи Эльмар Ибрагьимов алай вахтунда чIехибурун арада кьиле фидай Россиядин чемпионатдиз гьазур жезва.
Эмин Ибрагьимован гъилик вердишвилер къачузвай амай ученикрихъни тарифдин нетижаяр жезва. ИкI, спортдин мастер Султан Османова 16 кг-дин пут 1,5 сятина 5500 сеферда хкажна. Адан тIвар Гиннессан рекордрин ктабда тун патал къалурнава. С. Османова гьакIни 24 кг-дин пут са гъилив 240 сеферда хкажуналди ва 48 кг къвезвай пут хурудал кутIунна, кьве гъилин кьве тIуб турникдихъ галкIурна, ченеяр акъудуналди рекордар эцигнава.
За жува-жувак фикирзава: аламатдин кас я Эмин, адаз вич машгъул жезвай спортдин жуьреди руьгьдин таъминвал гузва, гьавиляй адахъ агалкьунарни жезва.
Аквазвайвал, лезги халкь къуватлу пагьливанралди, Шарвилидин халис невейралди девлетлу я. Абурукай сад тир Эмин Ибрагьимовахъ ва адан ученикрихъ спортда мадни чIехи агалкьунар хьун чи мурад я.
Хазран Кьасумов
