Са шумуд югъ идалай вилик Италиядин Пиза шегьерда кунг-фудай кьиле фейи дуьньядин чемпионатда Россиядин хкянавай командадик кваз Дагъустандай тир 4 спортсмендини: Гьажи-Дауд Гьасанова, Мугьаммед Къурбанова, Гьасан Мегьамедова ва Шамил Темирова  иштиракна.

ИкI, чи кIелчийриз фадлай таниш, вичин ери-бине Мегьарамдхуьруьн райондин Чахчарин хуьряй ва чемпионрин хизандай тир Гьажи-Дауд Гьасанова 75 кг-дин заланвал авай спортсменрин арада дуьньядин чемпионвилин тIвар къазанмишна. Аферин! Спортдин гьуьндуьр дережа чна адаз рикIин сидкьидай мубаракзава.­

 

РикIел хкин: Гь.Гьасанов яшар 10 йи­­сав агакьайдалай инихъ спортдин са шумуд жуьредал машгъул жезва. Ам ММА-дай Европадин (2014-йис, Ита­лия­дин Ливорно шегьер), гъилералди ку­кIунай кьве сеферда, ММА-дай, кунг-фу­дай Россиядин чемпионвилин тIвара­рин сагьиб, хейлин турниррин гъалибчи я. ИкI, “Лезги спорт” порталди Гь.Гьасанов алай йисан октябрдин вацран виридалайни хъсан спортсмен язни гьисабнава.

Алай вахтунда Гь.Гьасанова тренерар тир стха Эльдар Гьасанован  ва Махачкъалада “Чемпион” клубда Эседулла Эмирагъаеван гъилик вичин устад­вал­ хкажзава. Вичин къуватар Гьажи-Дау­да яваш-яваш пешекарвилин рингдани ахтармишзава, сифтегьан агалкьунарни ава. Алай йисан майдиз Каспийскда, Али Алиеван тIвару­нихъ галай спорт­дин, жегьилрин ва культурадин комплексда, кьиле фейи Fight Nights Global 66 (ММА) турнирда 70 кг-дин заланвилин кате­гориядай Гьажи-Дауда яшариз вичелай са кьадар чIехи Умар Тагьировахъ галаз бягь­сина (бамишардай къайда ишлемишуналди)  гъалибвал къазанмишна.

Гь.Гьасанован суьгьбетдай малум хьайивал, Пиза шегьерда дуьньядин чемпионатдин майданрал чи ватандашди 3 бягьс кьиле тухвана, Франциядай тир кьве ва Португалиядай тир са спортсмен адаз кумукьна. Финалда Франциядин спортсмендихъ галаз кьиле фейи бягьс иллаки четинди, бягьсиниз экъечI­навай спортсмен гзаф кьакьанди ва къулайсузди хьана, амма чи кьегьалдилай вич адалай къуватлу тирди субутариз алакьна.

Къейд авун лазим я хьи, кесерлу и акъажунра иштиракдай ихтияр Гь.Гьасанова алай йисан апрелдиз Санкт-Петербургда кунг-фудай кьиле фейи Россиядин чемпионатда 1-чка кьуналди къазанмишнай. А чIавуз Дагъустандин хкянавай командадик кваз чи республикадай 30 спортсменди иштиракна. Гьажи-Дауда и акъа­жунра кьве бягьс кьиле тухвана, финалда Москвадин патай экъечI­на­вай дагъус­танви Ш.Абдулжалиловахъ га­лаз вичин къуватар ахтармишна, бами­шардай къайдадикай менфят къачуналди, Гь.Гьа­санова инанмишвилелди гъалибвал къазанмишна.

Чи суьгьбетдин эхирдай Гь.Гьасанова вичиз дуьньядин чемпионатдиз фин патал куьмекар гайи вири ксариз: стха ва тренер-насигьатчи Эльдар Гьасановаз, карчияр, спортсменриз да­тIана куьмекар гузвай Азиз Яралиеваз ва Эдгар Адамоваз, гьакI­ни гъалибвал гваз хтай гьар сеферда вич (гьакI маса спортсменарни галаз) шад гьалара кьабулзавай, райондин спортсменриз еке куьмекар гузвай Мегьа­рамдхуь­руьн райондин кьил Фарид Агьмедоваз чухсагъул лугьун тIалаб­на. Чнани лезги халкьдин тIвар дуьньядин майданра машгьурунин карда чпин такьатар гьайиф текъвезвай вири рухвайриз аферин ва баркалла лугьузва!

— Заз спорт кIанарайбур, зун адал ри­кIивай ашукь хьуниз таъсир авурбур зи чIехи кьве стха: Эльдар ва Жавид я. Зун абуруз буржлу я, за къазанмишзавай агалкьунрик абурун чIехи пайни ква, — хълагьна мадни дуьньядин чемпион Гьажи-Дауда. — ИкI, пешекарвилин 5 бягьс кьиле тухвай Эльдара алай вахтунда зи тренер-насигьатчи яз, гьакIни Дербентда эцигунардай кампанияда кIвалахзава. Ам спортдивай къерех хьанвач, ада женгинин самбодай махсус къуллугърин арада кьиле тухузвай Россиядин чемпионатра, гьакIни какахьай единоборст­войрайни акъажунра вичин устадвал къалурзава. Жавида “Альянс-файтер” спортклубда тренер язни зегьмет чIуг­ваз­ва. Дербентдин суддин приставрин идарада кIвалахзава.

Чи мурад Гьажи-Даудахъ мад ва мад сеферра спортдин кьакьан кукIушар муьтIуьгъардай къуватар хьун я.

Цуьквер Рамазанова