Кьейидалай кьулухъ аял хана

Уьмуьрда биркуьлли баян гуз тежедай крар арадал къведа. И дуьшуьшни гьахьтинбурукай  сад я.

Торонтода фикир желбдай, аламатдин дуь­шуьш хьана — аял гробда хана.

И агьвалатда виридалайни пашманардай кар ам я хьи, 7 вацран аял авай дишегьли ви­чин машинда аваз больницадиз физвай, амма адавай руль хуьз хьанач ва зегьле къа­къатдай хьтин ава­рия­ арадал атана, нетижада ам кьилел ва хурал гзаф кьадар хирер-кьацIар хьуникди больницада кьена. Духтурри диде ва аял кьенвайди тестикьарна.

Гуьгъуьнин юкъуз кучукдай, мейит суруз авудай вахтунда аял шехьзавай ван атана. Ван са гьинай ятIани ваъ, гробдай къвезвай. Ихьтин лу­гьуз тежедай хьтин дуьшуьш акур инсанар аламат хьана амукьна. Дишегьли кьена 23 сят алатна­вай эхир. Адалайни гъейри, дишегьлидин мейит­ 17 сятда гурханадин холодильникда хьана. Кислород авачиз аялдал гьикI чан аламукь­натIа, гьа кар вирибур патал сир яз амукьна. И агьвалат­­­диз гьатта дишегьли кьенвайди тестикьарай духтурдивайни баян гуз хьанач: “За 22 йисуз­  дух­тур яз кIвалахзава… Завай им аламатдин кар я лугьунилай  гъейри маса са шейни лугьуз жедач!”

Руш зайифди яз хана ва 4 вацра ам инкубаторда хьана.

Торонтодай тир дишегьлиди аял гроб суруз авудайдалай гуьгъуьниз хана. Духтурриз­ аял сагъдиз амайди чир тахьун сир яз амукьна. Амма рушал чан аламукьун — им дуьньядал аламатар жеда лагьай чIал я.

Яхунариз алакьна

Индонезиядин РагъакIидай патан Ява вилаятда яшамиш жезвай 11 йис хьанвай, 190 килограмм къвезвай гададилай вич яхунариз алакьна, кхьизва “Daily Mail” газетди. Ам “дуьньядал  виридалайни куьк аял я” лугьузва. Гада са вацран къене 31 килограммдин яхун хьана.

Виликрай Арья Перманади йикъа вад сеферда тIуьн незвай, гададин иштягь чIехи кьве итимдин игьтияждив гекъигиз жедай. Гзаф четиндиз къекъвезвай аялдин диде-бубадиз адан уьмуьрдикай къурху авай ва адаз гъилин гастропластика ийидай ихтияр гана. И чIавуз индонезиецдин руфунин са пай акъудна. Операция куьк хьунихъ галаз женг чIугунихъ элкъуьрнавайди тир.

Лотереядай — 300 миллион манат

Новосибирскдин агьалидиз лотереядай 300 миллион манат къугъвана. Идан гьакъин­дай Россиядин “Столото” ТД-дин государст­в­о­дин лотереяяр чукIурдайдан сайтда хабар гузва. Гьелелиг пул садани вахчунвач.

Къейдзава хьи, ихьтин зурба приз “20-кай 4” Гослотодин” тарихда сифте яз къугъванвайди я. Гъалибчиди билет сайтдай 100 манатдихъ маса къачуна.

Kp.ru-дин малуматдал асаслу яз, россия­ви 29-майдиз дидедиз хьана, амма адан тIвар раижзавач. Пул акъатнавай кас и пулунилай 13 процентдин кьадарда аваз  налог гуниз мажбур я. Нетижада ада 261 миллион манат къачуда.

21-майдиз Сочидин агьалидиз “45-дакай 6” Гослотодай” 364 миллион манат акъатна. И кьадар пул лотереядай Россияда сад лагьай сеферда акъатзавайди я.

2016-йисан мартдиз Новосибирскдай тир духтурдиз “45-дакай 6” “Гослотодай” 358 мил­лион манат акъатнай.

ЦIийикIа тербияламишиз рекье туна

 Индиядин Керала штатда 9 кас кьейи 40 йис хьанвай фил кьуна. Идан гьакъиндай “Daily Mirror” газетди хабар гузва.

Пуд йисуз чкадин агьалияр вичикай икрагь авур фил Палгхат округда авай вацIун патав векь не­звайла акуна. Тамухъанар ва кьуд ветеринар вердишарнавай филерал алаз адан гуьгъуьна гьатна ва абуру ам хатасуз чкадиз гьална. Ина гьайван траквилизатор алай махсус хьелинай яна.

“Серенжем сятдин пудаз башламиш хьана, суьгьбетзава вагьши гьайванар кьунал маш­гъул жезвай ветеринар Арун Захариади. — Сад лагьай­ хьел сятдин 7-даз ахъайна,  сятдин 9-даз фил пар чIугвадай машиндиз ягъиз алакьна”. Гьайван  филер вердишардай Коданаддин центрадиз цIийикIа тербияламишун патал тухвана.

Филдин сад лагьай къурбанд 2014-йисан апрелдиз кьейи фермер хьана. 2017-йисан март­диз гьайванди дишегьлидиз кIур гана, ап­релдиз ада гьужумунин нетижада итим телеф хьана. Сан­лай къачурла, филди 9 кас кьена ва кьве касдал хирерна.

Февралдиз хабар гайивал, Индияда 6 кас кьейи пеленг кьунай.

КIуьд декьикьада цин кIаник

Англияда аламатдин дуьшуьш хьана. Кьуд йис хьанвай Джон-Генри Биртл гьавизда­ батмиш хьана. Дидедиз ам жагъидалди гада агъа кIан 9 декьикьада цин кIаник кумукьна.

Розаннади вичин хва  цяй ахкъудна. Адан гуьгъуьналлаз абуру ял язавай мугьманханадин работникни атана. 20 декьикьада ада гададин рикIив кIвалах хъийиз туна.

29 декьикьада кьван Джон-Генридин рикIи кIвалахнач. РикIи кIвалах хъийиз башламишзамазди ам больницадиз тухвана. Ина духтурри, ам ахтармишайдалай гуьгъуьниз аял яргъал вахтунда кислород авачиз амукьна ва и карди адан сагъламвилиз пис таъсирда, адавай къе­къвез ва рахаз жедач, аялдин мефтIедин ­кIва­лах кардик мад ахкатдач лагьана. Амма вад гьафтедилай вири диагнозрин “хъиляй” аял тамамдиз сагъ хъхьана ва больницадай аххъай­на.

Гьазурайди — Шагьисмаил Гьажимирзоев