Дербентда — футболдин академия

Къадим Дербентда “Анжи” Акаде­мия­дин филиал кардик акатнава.

Им Академиядин вад лагьай филиал я. Къенин юкъуз “Анжи” Академиядин филиалар Къизилюрт, Мегьарамдхуьруьн, Къумторкъала районра ва Аграрный университетдин бинедал алаз кардик ква. Анра 7-11 йис хьанвай гъвечIи футболистрин дестеяр кIватIнава. Филиалрин хъсан футболистрихъ Академиядин жер­геяр ацIурдай, “Анжи” ФК-ди тешкилзавай­ турнирра иштиракдай мумкинвилер же­да.

Дербентда Академиядин филиал ачухунин мярекатар кьиле фейи юкъуз шегьерэгьлияр, спортсменар ва мугьманар “Нарын-къеле” стадиондал кIватI хьанвай.

Спортдин къугъунин жуьрейрай ва кьезил атлетикадай ДЮСШ-дин директор Нежеф Эмирбегов сифте гаф рахана ва ада “Анжи” Академиядин филиал ачухна.

Дербент шегьердин кьилин заместитель Сергей Ягудаева дербентвийриз ихьтин савкьат Малик Баглиеван патай мубаракна, къацу майданрал къадим Дербентдин тIвар вине хуьн, агалкьунар къазанмишун алхишна.

Хъсан гафар-тебрикар гваз “Анжи” Академиядин векил Мегьамед Исаев, шегьердин администрациядин физкультурадин ва спортдин отделдин начальник Наваи Рзаев, ше­гьер­дин футболдин федерациядин председатель Ибрагьим Султанов, виликрай футболдин “Дербент” клубдик кваз къугъвай Феликс Къазиагьмедов, Али Вагьабов, Тофик­ Мирзаханов ва футолдин маса ветеранарни атанвай.

Махачкъаладай тир мугьманри Мегьамед Исаева ва Шигьабудин Микаилова жегьил футболистриз спортдин формадин комплектар ва маса алатар пишкешна.

Сифте туп ягъунин кьетIен везифа спортдин ветеран, 1960-йисан чешнедай РСФСР-дин чемпион Али Вагьабова кьилиз акъудна. Спортшколадин тербиячияр и юкъуз дуствилин матчар къугъвана.

«Лезги Газет»