Дербентда — архитектурадин фестиваль

12-июлдиз къадим Дербентдин “Азадвилин” майдандал архитектурадин “Урбанфест” фестиваль башламиш хьана. Шегьердин тарихда им архитектурадиз талукь сад лагьай фестиваль я. Инал шегьердин агьалияр, фестивалдин иштиракчияр администрациядин векилрихъ галаз гуьруьшмиш хьана.

Фестиваль ачухдайла, Дербент шегьердин кьил Малик Баглиева къейд авурвал, и мярекатдин проектар шегьерда уьмуьрдиз куьчуьрмишзавай проектрихъ, иллаки “Шегьердин къулай шартIарин макан тешкилун” госпрограммадихъ галаз алакъалу хьун лазим я.
— Дербентда вири кьетIен, надир я — адан тIвар, яшар ва медениятдин ирсинин гьар са объект. Зун саналди тир нетижалу кIвалахдихъ инанмиш ва квехъ агалкьунар хьун зи мурад я, — къейдна шегьердин кьили.

Чирвилерин программадин кар алай мярекатар ва объектрин проектар туькIуьрун “Дербентда авай I Петрдин кIвал” музейдин комплексда кьиле фида.
Фестивалдин сергьятра аваз шегьердин кьуд майдандал объектрин проектар туькIуьрда ва эцигна куьтягьда. Архитектурадин гъвечIи жуьреяр ва шегьер къулай авунин маса шейэр магьалра, гьуьлуьн къерехда, Гагаринан тIварунихъ галай куьчеда ва “Азадвилин” майдандал эцигда.

16-июлдиз “Дербентда авай I Петрдин кIвал” музейдин комплексда архитектурадин проектрин фестивалдин иштиракчийри гьазурнавай проектрин презентация хьана.
Ана шегьердин кьилин заместитель Сергей Ягудаева ва шегьердин кьилин архитектордин везифаяр тамамарзавай Абуферез Панагьова иштиракна.
Фестивалда иштиракзавай архитекторри, чпин проектар гьазурдайла, чкадин агьалийрихъ галаз меслятар авуна, абурувай чпин фикирар лугьун тlалабна.
Икl, магьалдин агьалийри азад вахт акъуддай шартlар авачирдан патахъай шикаят авуна. Иса Мегьамедова регьбервал гузвай архитекторрин дестеди гьазурзавай проектдин кьилин макьсад ана вири яшарин агьалийриз ял ядай къулай шартlар яратмишун я.

Агьалийрин фикирдалди, “Азадвилин” майдандал фонтан, зегьем юкъуз акъваздай ва ацукьдай серин чкаяр, гьакlни къацу тарар алач. Михаил Микадзеди регьбервал гузвай архитекторрин дестеди, агьалийрин тIалабунарни фикирда аваз, “Дагъдин кIвал” тlвар алай проект презентация авуна.
К.Цунтаеван командади Гагаринан тIварунихъ галай куьчеда жедай эцигунрин карта къалурна. Кlватl хьанвайбуру абурун проектдиз хъсан къиметни гана.
“Набережная на Агафонова” проект гваз анал Алиса Марковади регьбервал гузвай десте экъечlна. “Секинвал” тlвар алай и проект асуллуди яз гьисабнава.

Санлай къачурла, проектар хъсанбур хьанва. Абур уьмуьрдиз кечирмишун патал гзаф зурба кlвалахар авуна кlанзава. Проектрин иесийри вири шегьерэгьлийриз и карда иштиракуниз эвер гузва. Шегьердин администрацияди, вичин патай куьмек яз, эцигунардай материаларни техника чара ийидайвал я.

Къагьриман Ибрагьимов