Дамахдай гъалибвал

Алай йисан 15-июндиз Санкт-Петербургдин Таврический дворецда Жегьилрин премияр вахкуниз талукьарнавай шад мярекат кьиле фе­на. “Ватандиз къуллугъ авунай” номинациядай сад лагьай чкадиз Россиядин милли гвардиядин Кефердинни РагъакIидай патан округдин кьушунрин батальондин командир-капитан Мурадхан  Агьмедханов лайихлу хьана. И гъалибвал Сулейман-Стальский райондин ЦIийихуьряй тир чи ватанэгьли­диз Кеферпатан меркездин губернатор Георгий Полтавченкоди ва Законодательный Собранидин председатель Вячеслав Макарова тебрикна.

Жегьилрин премия 15 йис идалай вилик бажарагълу жегьилриз рехъ ачухунин мураддалди Санкт-Петербургдин Общественный советди тайинарнавайди я. Алатай йисара и премиядиз 196 кас лайихлу хьана. ЦIи конкурсда иштиракай 223 касдикай  спортдин, образованидин, илимдин, культурадин,общественный ва маса хилера агалкьунар къазанмишай 15 жегьил тафаватлу хьана.

Къейд авун лазим я хьи, Мурадхан Агьмедханова 7 йис идалай вилик  Россиядин МВД-дин къенепатан кьушунрин Санкт-Петербург­дин военный институт къизилдин ме­далдалди куьтягьна. Взводдин командир яз къуллугъиз эгечIай Агьмедханов къуллугъдин гурарай виниз инанмишвилелди хкаж хьана ва исятда ам батальондин командир я.

Вичи регьбервал гузвай батальонда къуллугъдин везифаяр лап хъсандиз кьилиз акъудунихъ галаз сад хьиз, Мурадхан Агьмедханов илимдални машгъул жезва. Ада учебный центрада кIелзавай, къуллугъзавай ксарин пешекарвал хкаждай са шумуд  методика арадал гъанва. Алатай йисуз ада Россиядин милли гвардиядин Федеральный къуллугъдин частара чирвилер гудай методика арадал гъунай конкурсда гъалибвал къазанмишна. Ам илимрин кандидатни я.

Вичин везифаяр намуслу­вилелди, чешнелудаказ кьилиз акъуд­завай капитан М.Агьмедханован алахъунар РФ-дин къенепатан крарин министерстводи “Аскервилин жуьрэтлувиляй” ва “Къуллугъда тафаватлу хьунай” медалралди, гьуьрметдин грамотайралди къейднава.

Чна ихьтин намуслу, дирибаш, Ватандиз вафалу хва тербияламишнавай Мурадханан диде-бубадиз сагърай лугьузва.

Низамидин Къайинбегов