Чирвилер артухариз…

Зигьин авай аялрин “Сириус-Альтаир” центради гатун пуд лагьай смена Дербентда ачухна, —  хабар гана шегьердин администрациядин пресс-къуллугъди.

“Сириус-Альтаир” центрадин гатун пуд лагьай смена ачухунин сергьятра аваз, иштиракчийрихъ галаз РД-дин образованидин министр Ш.Шагьов, адан заместитель А.Карпухин ва Дербент шегьердин обра­зованидин управленидин начальник В.Къулиев гуьруьшмиш хьана.

Россиядин къадим шегьерда кьиле физвай сменади тарихдин, праводин, обществознанидин, урус чIалан тарсарай чирви­лер къачун патал республикадин вири районрай, санлай къачурла, бажарагълу 100 аял кlватl­на.

Образованидин рекьяй тешкилнавай серенжемар Дербент шегьердин 6-нумрадин интернатда  кьиле физва. Аялриз Москвадай атанвай 5 муаллимди ва чкадин машгьур пешекарри тарсар гузва. Мярекатдин кьилин макьсад зигьин авай аялрин яратмишунрин союзар тешкилун, абуруз коммуникациядинни яшайишдин вер­диш­вилер гегьеншариз куьмек гун я.

Рикlел хкин: Дагъустанда зигьин авай аялрин “Сириус-Альтаир” центр РФ-дин Федеральный Собранидин Федера­циядин Советдин  член Сулейман Керимован, РД-дин Кьил Р.Абдулатипован теклифдалди ачухна.