Бурандин цилери иви хъсан михьи ийида

100 г  регъвенвай бурандин цилерал 0,5 л эрекь илична, 14 юкъуз тада. Ахпа ам, са шумуд къат жунадай куьзна, йикъа 3-4 сеферда фу нез зур сят амайла, 1/4 стакандавай цик хуьрекдин са тIуруна авай порошок хуькуьрна, хъвада. Сагъарунин вахт 2-3 гьафте я. И процедура йиса 2 сеферда кьиле тухуда.

Халкьдин медицинади тестикьарзавайвал, бурандин цилери шарар алудунизни куьмек гуда. Бурандин цилер пуд юкъуз ишлемишайла, квел алай шарар алатда.

* * *

Сенжефил (имбирь) квай чайди иммунитет хкажда. Са гъвечIи катулдиз чайдин са тIуруна авай регъвенвай сенжефил вегьена, винелай са стакандавай ргазвай яд илична, 5 декьикьада зайиф цIал эцигда. Ахпа ам пичини­лай алудна, регъвенвай са силих серг, регъвенвай яру ис­ти­вут (чукIулдин кIвенкIвел алайди) хуькуьрна, куьзна, хуь­рекдин са тIуруна авай лимондин миже ва са чайдин тIуру­на авай вирт хуькуьрна, куьлуь-куьлуь хупIар ийиз хъвада.­

Уьгьуьяр хкуддай тIямлу рецептар

Чуьхверрин. Са стакада авай кьурурнавай чуьхверрал 0,5 л къайи яд илична, зур сятда ргада. Ахпа ам пичинилай эляна, хъсандиз кIевирна, 4-5 сятда тада. Чуьхверар ядни кваз неда. Кьурай чуьхверар авачиз хьайитIа, тазабур ишлемишайтIани жеда.

Бананрин. Дигмиш хьанвай 2 банан куьлуьз куьткуьнна, шир алай катулдиз вегьена, са стакан ргазвай яд илична, 10-15 декьикьада ругуна, кузмаз куьзна, хуьрекдин са тIурунавай вирт хуькуьрна сививай эхи жедайвал куз-куз хъвада. Ихьтин компотди уьгьуьяр фад хкудда.

Жумарин. Уьгьуьяр акатнамазди 1-2 жум хъсандиз чуьхвена, цилерни кумаз куьлуь кIусариз атIана, 2 стакандавай яд илична, 5 декьикьада ргада. Жумарин гьалима, куз-куз хъвада. Адак шекер ва я вирт хуькуь­рай­­тIа­ни жеда. И гьалимади уьгьуьяр фад хкудда.

Мекьивилелай азарлу хьанвайла, хуьрекдин 1,5 тIуруна авай кишмишрал са стакан къайи яд илична, са сятда тада. Ахпа ам куьзна, кусудалди вилик кудай некIе­дихъ галаз неда.

* * *

КIвачер гзаф гьекь жедайла, абурал мегъуьн тарцин чкалрин порошок кIвахна, гуьлуьтар алукIна, пакамал­ди тада. Экуьнахъ кIвачер къайи це чуьхуьда. И процедура кIвачер гьекь таххьунин сифте лишанар малум жедалди гьар юкъуз ийида.

КIвачерал таб акьалтайла ишлемишдай гзаф хъсан, кьи­линди — гьар садавай регьятдиз гьазуриз жедай менфят­­лу такьат лимондин шире  я. Адакай агъзурралди инсанриз куьмек хьанва­.

Пакамахъ ва нянихъ (йифиз) кIвачерин кIанерив таза лимондин шире гуьцIда. Шире кьурадалди къекъвена виже­­ къведач ва кIвачин къапарни алукIдач. Идалайни гъейри, ам кIвачерихъай пис ни татун патални вижевай такьат я.

Ивидин шекердин кьадар тIимиларун патал, нянилай са стакандавай кефирдиз хуьрекдин са тIуруна авай гречкадин чIахар вегьена, пакамалди тада. Экуьнахъ ам ичIи рикIелай неда. Сагъарунин вахт 10 югъ. Са шумуд юкъуз ял яна, мад тикрар хъийида.

«Айболит» газетдай гьазурайди — Надият Велиева

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя