Акьалтзавай несил тербияламишуниз, уьмуьрдин шегьредал акъудуниз чпин уьмуьр, чирвилер, къуватар бахшнавай муаллимар гзаф ава. Абурукай сад Кьулан СтIалрин  Россиядин Игит Р.Халикьован тIва­рунихъ галай юкьван школадин директор,  РФ-дин образованидин гьуьрметлу работник  Ифриз  Тапшировна  Бабаева  я.

Мукьвара райондин кьил ­Нариман Абдулмуталибова яр­гъал­ йисарин бегьерлу зегьметдай, акьалтзавай несилдиз чирвилер ва тербия гунин карда хьанвай агалкьунрай ва районда образованидин хел вилик тухуник еке пай кутунай Ифриз муаллимдив райадминистрациядин патай Гьуьрметдин грамота вахкана.

И.Бабаева Герейханован хуьре яргъал йисара духтурви­ле­ кIвалахай, халкьдин патай гьуьрмет-кIанивал къазанмишай Тапшир ва Бажихалум Рустамоврин хизанда 1967-йисуз дидедиз хьана. Ифриза ва адан кьве стхади низамлу, мари­фатлу и хизанда хъсан тербия, школада дерин чирвилер къачуна, абурукай хуьруьз-кIва­лиз, об­ществодиз хийир авай ин­са­нар хкатна.

Хуьруьн юкьван школа акьал­­тIарай Ифриз Дербентдин педучилищедик экечIна. 1987-йисуз анаг яру диплом къачуналди куьтягьна. Вичин зегьметдин рехъ жегьил пешекарди Къазахстан Республикадин Мангишлакский областда сифтегьан­ классрин муаллимвиле кIва­лах авунилай башламишна.

— Гъурбатда заз тежрибалу муаллимрихъ, хъсан методист­рихъ галаз кIвалахдай мумкинвал хьана, гьавиляй за гьа йи­сар­ еке гьевесдивди рикIел хкизва, — лугьузва Ифриз муаллимди.

Ифриз Тапшировнади, кIва­лахни ийиз, 1993-йисуз Гурьев шегьердин госуниверситетдин тарихдин ва праводин факультетни акьалтIарна. Гьа и йисуз хайи ватандиз хтай И. Бабаева Кьулан СтIалрин юкьван школадин директордин заместителвиле-тешкилатчивиле тайинарна.

2014-йисуз райондин образованидин управленидин начальникдин заместителвиле кIвалах авурдалай гуьгъуьниз И.Бабаева Кьулан СтIалрин аялрин бахчадин заведующийвиле ра­къурна.

Ина кIвалахай са йисан къене Ифриз Бабаевади вичикай хъсан фикирар туна. Бахчадиз герек эменни хкана, цIийи группа ахъай­на, анин гьаят аваданламишна…

2015-йисуз И. Бабаева мад Кьулан СтIалрин Россиядин Игит Радим Халикьован тIвару­нихъ галай юкьван школадиз, и сеферда директорвилин везифаяр тамамариз хквезва.

Адан чалишмишвилер себеб яз школада художественный самодеятельностдин коллектив, паталай тежрибалу хореограф гъана, кьуьлердайбурун группа тешкилна. Аялри районда ва республикада тухвай конкурсра-килигунра са шумудра кIвен­кIве­чи чкаяр кьуна, лауреатвилин тIварар къачуна.

— За директорвилин кIвалах коллективда низам школадин материалринни техникадин база мягькемарунилай, муаллимриз кIвалахдай кутугай шартIар яратмишунилай башламишна. Школа Россиядин Игитдин тIвар­цIихъ гала, ида чун хъсандиз кIвалахуниз, гьар са рекьяй вилик жергейра хьуниз мажбурзава, — лугьузва Ифриз Тапшировнади.

Гьакъикъатдани, И. Бабаевади директорвиле кIвалахзавай и куьруь девирда ана хъсанвилихъ еке дегишвилер кьиле фе­на: школада предметрин кружокар, гьакIни лезги адетар хуьнин, гъаларикай шейэр хрунин, рушар гележегдин кIвалин-къан иесияр хьуниз гьазурунин ва ма­са кружокар кардик кутуна, школадин гьаят безетмишна.

Школьникри чпин алакьунар районда ва республикада тухузвай олимпиадайра, конкурсра, килигунра ва маса мярекатра къалурзава.

2015-2016-кIелунин йисуз — 4 ва 2016-2017-кIелунин йисуз 6 аялди школа къизилдин медалар къачуналди акьалтIарна.

Алатай кIелунин йисуз РУО-ди гьазурай образованидин идарайрин рейтингда Кьулан СтIал­рин юкьван школа 3-чкадал алай. Имни агалкьун я.

Школада 70-дав агакьна муаллимри, 20 кас технический пешекарри кIвалахзава ва 320 аял­ди кIелзава. Коллектив гъве­чIи­ди туш, ана садвал, гьуьрмет ава­.

— КIандатIа коллектив хьурай, я тахьайтIа кIвал-хизан, сифте нубатда ана къайда, низам хьун лазим я, — давамарзава ихтилат Ифриз Бабаевади. — И месэла чи школада сифте чкадал ала. ИкI, къайда-низам хуьниз, хъсандиз кIелуниз, михьивилер хуьниз, об­ществен­ный кIвалахра иштиракуниз талукь яз чна школада классрин арада конкурсар тухузва. Лугьуз­ жеда хьи, ида хъсан нетижани гузва.

Тежрибалу педагог, хъсан руководитель хьиз, Ифриз муаллим мегьрибан диде, кIвалин къул хуьзвай кайванини я. Ада вичин уьмуьрдин юлдаш Къафарахъ галаз низамлу кьве велед тербияламишна. Дагъустандин госуниверситетдин юридический факультет ва Москвадин психологиядин университет акьалтIарнавай руш Янадихъ вичин кIвал-хизан хьанва, гада Бубади Москвадин профессиональный университетдин экономикадин факультетда кIелзава.

Эхь, И.Бабаевади муаллимвилин вири уьмуьрда хъсанвал авунин, акьалтзавай несилдиз чирвилер гунин, инсан тербия­ла­­мишунин рехъ хкянава. И бар­­каллу рекье адахъ мадни еке агалкьунар хьун чи мурад я.

Хазран Кьасумов

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя