РФ-дин Президентди Яракьлу къуватрин къудратлувал хкажун патал гзаф алахъунар ийизва. Россиядин Федерациядин Яракьлу къуватрин частари чпин вилик эцигнавай везифаяр вафалувилелди кьилиз акъудзава. Чи республикадай чпин пак буржи кьилиз акъудун патал армиядин жергейриз физвай аскеррини уьлкведин вири округра лайихлудаказ къуллугъзава. Разивалдай кар ам я хьи, виридахъ галаз санал лезги халкьдин векиларни Ватандин къаравулда уяхдиз акъвазнава. Ахьтин рухвайрикай сад Чечен Республикадин Шали шегьерда къуллугъзавай Хив райондин ЗахитIрин хуьряй тир Артур Къазиагьмедов я. И кардикай “Лезги газетдиз” адан командирдин заместителди кхьена.
“Гвардиядин сержант Артур Къазиагьмедова Евпаториядин мотострелковый дивизиядин машгьур гвардейский 42-батальондин танкарин 1-ротадин 2 лагьай взводдин танкунин командир яз Кьиблепатан военный округда Чечен Республикадин Шали шегьерда къуллугъзава.
Къуллугъдин вахтунда Артура вич кар алакьдай, викIегь аскер тирди раижна. Ада вичел ихтибарнавай техника, яракьар саламатдиз хуьзва, къуллугъдин везифаяр, командиррин тапшуругъар гьакъисагъвилелди кьилиз акъудзава. Артураз юлдашрин арада чIехи гьуьрмет ава, ам вични диде-бубади чIехибуруз гьуьрмет-хатур ийиз тербияламишнава. Чирвилер ва ахлакь авай ада дивизиядин, батальондин командирри вичел тапшурмишзавай кIвалахар вини дережада аваз тамамарзава.
А.Къазиагьмедова дивизияди кьиле тухузвай ученийра, маса серенжемра са шумудра иштиракна. Ада и акъажунра вичи къуллугъзавай батальондин тIвар лайихлувилелди хвена ва приздин чкаяр кьуна. И жигьетдай Артураз командованидин патай еке гьуьрмет ава. Артуран лайихлувилер дивизиядин руководстводи къиметлу пишкешралди, гьуьрметдин грамотайралди къейдна.
Ватандин вилик вичин пак буржи намуслувилелди кьилиз акъудзавай гвардиядин сержант Артур Къазиагьмедов чешнелу командир я.
27777-военный частунин танкарин батальондин
командирдин заместитель,
гвардиядин капитан М.Степанов”.
Гьазурайди — Земфира Бабаева
