“Шарвили” эпосдин суварин вилик квай  йикъара чал шад хабар агакьна: вичин ери-бине Сулейман Стальский райондин Асалдхуьряй тир  Амаханов  Альберт  Къагьримановича,  РФ-дин здравоохраненидин Министерстводин Рязандин государственный медицинский университетда “Коррекция энтеральной недостаточности при острой кишечной непроходимости” темадай диссертация агалкьун­ралди хвена, медицинадин илимрин кандидатвилин тIвар къачунва.

Жегьил алимдин илимдин кIвалахдиз адан руководитель, ме­дицинадин илимрин доктор, профессор Федосеев Андрей Владимировича, официальный оппонентри — медицинадин илимрин доктор, Ростовдин медуниверситетдин доцент, умуми хирургиядин кафедрадин заведующий Белик Борис Михайловича, медицинадин илимрин доктор, Н.П. Огареван тIварунихъ галай Мордовиядин государственный университетдин профессор, факультетский хирургиядин кафедрадин заведующий Власов Алексей Петровича, гьакIни маса алимри еке къимет гана.

ГъвечIи ва адалатлу хуьрерикай сад тир Асалдхуьряй чIехи къуллугърин, лайихлу тIварарин сагьибар гзаф акъат­нава­тIа­ни, Альберт Амаханов анин сад лагьай алим я. Алимвилин чIехи тIвар мубарак авунихъ галаз санал, чаз адахъ мягькем сагъвал, хизанда бахт-берекат, илимдин рекье ва духтурвилин пешеда агалкьунар хьана кIан­зава.

Къейд: Альберт Къагьриманович Амаханов 1971-йисан 2-сентябрдиз Махачкъала шегьерда дидедиз хьана. 1988-йисуз юкьван школа куьтягьна. 1990-йисуз Да­гъус­тан­дин медучилище яру дипломдалди акьалтIарна.

1990-1992-йисара Советрин Армиядин жергейра къуллугъна.

1992-йисуз Дагъустандин  медакадемиядик экечIна ва 1998-йисуз анин лечебный факультет агалкьунралди акьал­тIарна. 1999-2000-йисара Рязань шегьерда хирургиядай  интернатурада кIелна.

2000-2005-йисара Рязандин областдин райондин больницайрикай сана духтур-хирург яз кIва­лахна.

2005-2007-йисара И.П. Павлован тIварунихъ галай Рязандин госмедуниверситетдин умуми хирургиядин кафедрада клинический ординатурада кIел­на. Анаг акьалтIарайдалай гуьгъуьниз духтур-хирург яз кIвалахун давамарна.

2011-йисалай Рязандин госмедуниверситетда преподавателвилин кIвалахдал машгъул хьана, 2012-2015-йисара умуми хирургиядин кафедрада аспирантурада кIелна.

20I6-йисан декабрдин вацра медицинадин илимрин кандидатвилин тIвар къачуна ва ам ВАК-дини тестикьарнава.

Алай вахтунда жегьил алим Рязандин госмедуниверситетда илимдинни преподавателвилин кIвалахдал машгъул я.

Гьуьрметлу хизанда 3 руш тербияламишна. ЧIехи руш Аида РФ­-дин силисдин комитетдин Академиядин студентка я, Эми­нади 9-классда кIелзава, гъвечIи Марьяман 2 йис я.

Альбертан буба Къагьриман муаллим тир, сифте Шихидхуьруьн СОШ-дин, Асалдхуьруьн ООШ-да кIвалахиз 46 йис я. Диде Жагьана 1974-йисалай инихъ райондин ЦРБ-дин терапевтический отделенидин медсестра яз кIва­лахзава.

Абуру чпин 5 веледдивни (3 рушни 2 гада) кIелиз туна, зегьметдин къадир чирна, уьмуьрдин шегьредал акъуд­нава­.

— Заз духтурвилин пеше кIанарайди сифте нубатда дидедин къастунал кIевивал, хкягъай пешедал рикI хьун, зи бубадин гзаф йисарин дурумлу зегьмет, адан насигьатдин гафар хьана, — лугьузва жегьил алимди.

Эхь, хайи райондин, хуьруьн, тухумдин ад хкажзавай Амаханов Альберт хьтин кьегьал рухвайрилай чешне къачуниз лайихлу я.

Абидин Камилов, шаир

 

ОСТАВЬТЕ ОТВЕТ

Войти с помощью: 
Пожалуйста введите ваш комментарий!
Введите ваше имя