Дагъустанда дагъдин чайдин фестиваль кьвед лагьай сеферда кьиле тухуда. Мярекат алай йисан августдиз республикадин Сулакдин каньондин мулкунал тешкилдайвал я.
Фестиваль тешкилунин макьсад Дагъустандин тIуьнрин кьетIенвилер, кьилди къачуртIа, дагъдин чай раиж авун я, хабар гузва Дагъустандин туризмдин министерстводин пресс-къуллугъди.
Дагъдин чайдин къаришмаяр Дагъустанда, адет яз, дамах ийизвай шейэрик акатзава. Абурун кьадарди ва жуьреба-жуьрвили, дугъриданни, гьейранарзава. Гьар са хуьре кIубанардай къаришма гьазурунин вичин кьетIен рецепт ава.
Мярекатдал вири жуьрейрин чаярин (адетдин чIулав чайдилай башламишна векьер-кьаларин чайдал агакьдалди) выставка ачухда. Ина гьакIни жуваз кIандай кьван чай пулсуздаказ хъваз жеда. Фестивалдин сергьятра аваз Дагъустандин милли тIуьнар гьазуриз чирдай мастер-классар кьиле тухуда, республикадин халкьдин художественный сеняткарвилин продукция маса къачуз жеда.
Сад лагьай сеферда дагъдин чайдин фестиваль 2016-йисан августдиз Гуниб райондин тарихдин мемориальный “Ватан” комплексда хьанай. А чIавуз и мярекатда Россиядин жуьреба-жуьре регионрай ва къецепатан уьлквейрай атанвай 500-далай артух мугьманри иштиракнай.
Жасмина Саидова
