“Лезги газетдин” чинриз Кьурагь райондин КIирийрин хуьряй тир Зейнудин Батманован кьегьалвиликай сифте яз газетдин кьилин редакторди, гуьгъуьнлай хейлин маса авторрини макъалаяр чапна. Ада, вичин чан къурбандна, пуд кас бандитрикай къутармишна.
Гьуьрметлу лезгияр, лезги халкьдин патай хкянавай Госдумадин, РД-дин Халкьдин Собранидин депутатар, районрин кьилер, лезгийрин вилик-кьилик квай векилар! Ша, чна вирида, сад хьана, а касди авунвай кьегьалвилиз къимет гунин патахъай чалишмишвал ийин. Вучиз чун ихьтин кIвалахар хьайила “зун, вун” лугьуз са патахъ акъваззава? Зейнудин Батманова масабур патал вичин чан къурбандна. Адан балайрин, юлдашдин, яшлу дидедин вил, ам хкведа лугьуз, рекьел ала. Ша, чун адаз Россиядин Игитдин тIвар гунин месэла кьилиз акъудиз алахъин.
И кар кьилиз акъудун патал лезги халкьдин бажарагълу ксарини къайгъу чIугуна кIанда. Чи халкьдин вилик-кьилик квайбуру З.Батманова авунвай кьегьалвал государстводин кьилин органри къейд ийидай хьтин серенжемар кьабулдайдак умуд кутаз кIанзава.
Шихали Багъиров
