7-июлдиз Ахцегьрин РДК-дин залда РД-дин здравоохраненидин министерстводин штабди, чкадал фена, заседание кьиле тухвана. Ам чахуткадин азар дуьздал акъудунин ва адан вилик пад кьунин месэладиз талукьарнавайди тир.
Адан кIвалахда РД-дин здравоохраненидин министерстводин, республикадин чахуткадиз акси диспансердин пешекарри, Ахцегь, Докъузпара ва Рутул районрин больницайрин кьилин духтурри, школайрин директорри, СП-рин кьилери, общественный тешкилатрин векилри иштиракна.
Мярекат Ахцегь муниципалитетдин кьилин заместитель, РД-дин лайихлу духтур, медицинадин илимрин кандидат Мегьамед-Рауф Гъаниева ачухна ва ада микрофондихъ РД-дин чахуткадиз акси диспансердин кьилин духтур, медицинадин илимрин кандидат, РД-дин лайихлу духтур Абдуразакь Адзиеваз теклифна.
— Чахутка лап куьгьне ва гзаф хаталу азар я. Ам дуьньяда инсаниятдихъ галаз санал арадал атана, — башламишна ада вичин суьгьбет. — Садакай масадак акатдай ваба, тиф, къиздирма, дифтерия хьтин хаталу азаррин вилик пад кьунватIани, чахуткадихъ галаз сакIани женг чIугваз жезвач. Нетижада гьар йисуз дуьньяда 10 миллиондив агакьна инсанар азарлу жезва ва абурукай 2 миллион рекьизва. Роспотребнадзордин делилралди, эхиримжи вахтара Россияда, гьа жергедай яз Дагъустандани, чахуткади кьил хкажзава. Месела, Ахцегь районда учетда авай 23 кас азарлуйрикай — 9, Докъузпарада — 20 ва Рутула — 10 кас азарлуяр хаталу гьалда ава. Гьелбетда ихьтин гьалари чак къалабулух кутазва. Гзафни-гзаф и азар яшайишдин пис шартIара яшамиш жезвай, дуьзгуьн тIуьн-хъун авачир, пIапIрус, ички, наркотикар ишлемишзавай, СПИД, хуквада хер, шекердин диабет, гепатит ва хронический маса азарар авай инсанрик акатда. Хаталу и дестедин ксарал кьетIен гуьзчивал авун лазим я. Инсандик и азар квайди гьикьван фад чир хьайитIа, гьакьван фад ам сагъаризни жеда, — къейдна Абдуразакь духтурди.
Чахуткадин вилик пад кьунин месэлайрикай РД-дин чахуткадиз акси диспансердин кьилин духтурдин заместитель Мегьамед Асхабалиева, республикадин Минздравдин кьилин терапевт Мегьамед Абдуллаева, Дербент шегьердин туббольницадин кьилин духтурдин заместитель Мегьамед Гьамзаева, Ахцегь ЦРБ-дин кьилин духтур Мери Исмаиловади, Ахцегь туббольницадин кьилин духтур Зулейха Агьмедовади, Докъузпара ва Рутул ЦРБ-рин кьилин духтурар тир Шагьлар Бухсаевани Идрис Алиева чпин фикирар лагьана.
Гуьгъуьнлай Мегьамед- Рауф Гъаниева заседанидин нетижаяр кьуна ва чахуткадихъ галаз женг чIугун активламишунин рекьер-хуьлер тайинарна, ада заседанидин иштиракчийриз Ахцегь райондин руководстводин ва вири районэгьлийрин патай чухсагъул малумарна.
Дашдемир Шерифалиев
