Гьеле гъвечIи классра кIелзавай чIавуз вичивай за кьуьлериз чирай Гьажи Агъаевахъ галаз мукьвара гуьруьшмиш хьайила, адан мецел атай “чан аламай кьван милли культурадиз къуллугъда” лагьай келимади зав фикириз туна. Еке шабагьрин гуьгъуьна авачир, гьакъикъатдани, райондин, республикадин дережадин фестивалринни конкурсрин ва маса мярекатрин иштиракчи, милли медениятдал рикI алай Гьажи Агъаева и хиле кIвалахиз зур асирдилай гзаф я. Ам “Ахцегьрин къеле”, “Шарвили” тIварар алай, документрин бинедаллаз туькIуьрнавай кинофильмайрани къугъванва. Са жерге конкурсринни фестивалрин гьуьрметдин грамотайризни дипломриз лайихлу хьанвай Гьажи Агъаеваз и йикъара “Дагъустан Республикадин культурадин лайихлу работник” лагьай тIварни ганва.
Гьина кIвалахайтIани, гьихьтин агалкьунар хьайитIани, адавай вичин рикI алай пеше таз жезвач, гадайрикай ибарат са гъвечIи дестедиз ада кьуьлеризни чирзава.
“Пагь, йифен демер. Заз лап гъвечIи чIавалай кьуьлериз кIандай. Лезгийрин къадим ва зарб макьамдин ван япа гьатун кумазни кIвачер акъвазариз жедач. Залай чеб чIехи, армиядай хтанвай гадаяр яз Абрек Гьажиева, Аса Асаева, Гьамидуллагь Фазалиева демерик хкадардайла, хъсан кьуьлдайди чиз, зун чпин юкьва твадай”, — рикIел хкизва Гьажи Агъаева.
И кар Ахцегьа виридаз чидай. Зурба тешкилатчи Перин Перинова “бажарагъдихъ гелкъвена кIанда, адал кIвалахайла, бегьерни гуда” лагьана, цIуд йиса авай жегьил Гьажи Культурадин кIвализ гъана, Нияз Эфендиеван гъилик кьуьлердайбурун дестедик кутуна. Муаллимди цIуд йиса авай хъсан ученик гьеле 1961-йисуз чIехи са мярекатдал сегьнедиз акъудна. Гьажиди вичиз авур ихтибар гьахъдиз акъудна: эгер йифен демерик адан алакьунриз гьакI килигзавайтIа, ина вирида кIвачел къарагъна, капар янай.
— Нияз Эфендиева заз хореографиядин сифтегьан сирер чирна, зак кьуьлер авунин карда мадни гзаф ашкъи — гьевес кутуна. Гуьгъуьнлай Гьемдуллагь Бабаева далдамчийрин ва кьуьлердайбурун дестеяр тешкилайла, за адавайни чирвилер къачуна. Абур кьвед за жуван сифтегьан муаллимар, меслятчияр яз гьиссзава, — лугьузва Гь.Агъаева.
Ахцегьа школа акьалтIарна, армияда къуллугъна хтай жегьил итим райондин Культурадин кIвалин методиствиле кIвалахал кьабулзава. Са тIимил вахтундилай Заур Гьажиева гележег авай жегьил гада вичин, яни директордин чкадал эцигзава. И къуллугъдал Гьажи Агъаева гьакъисагъвилелди зегьмет чIугуна ва 1978-йисуз ам Махачкъалада культпросветучилищедик экечIна.
— Культпросветучилищеда за гзаф бажарагълу, чпин кар чидай муаллимрин гъилик кIелна. Абурун арадай яз Матаев Шалуми Самуиловичан, Къурбанов Къурбан Абдурашидовичан, Мамедов Нариман Раджибалиевичан, Ибрагьимов Исрапил Исрапиловичан тIварар кьаз жеда, — къедна Гь.Агъаева.
Кьуьлер авунин рекьяй пешекар хьана Ахцегьиз хтай Гьажи Агъаев Культурадин кIвале хореографвиле кIвалахал кьабулна. Жегьил пешекардиз Туркменистандиз атун теклифна. Фагьум-фикир авуна, аниз фейи Гьажи клубдин директорвиле тайинарна. Къунши халкьдихъ галаз лап хуш рафтарвилера аваз ада ина 9 йисуз директорвиле кIвалахна.
— ШартIар гьикьван хъсанбур тиртIани, Ватандиз, къадим Ахцегьиз хтуникай за гьамиша фикирзавай. ИкI, Ахцегьрин Культурадин кIваляй заз мад хореографвиле кIвалахун теклифна. Артух фикирар тавуна, зун ватандиз хтана ва къедалди гьа ина кIвалахзава.
РикIел хкин, гьам мехъерик, гьам сегьнедал виликрай чи бубайрин къадим кьуьлер ийидай, исятда лагьайтIа, гзаф дуьшуьшра дишегьлидинни итимдин кьуьл гьа сад хьтинбур хьанва. И крар къе Гьажи Агъаеваз хуш туш. “Гьар са карда милливал хуьн герек я ва гьа са вахтунда маса халкьарин медениятдизни гьуьрметна кIанда”, — лугьузва ада.
Дагъви Шериф
