Къе, 20-майдиз, Дербент райондин Белиж поселокда авиациядин генерал-майор, чи машгьур ватанэгьли Тагьир Гьажиев тебрикуниз талукьарнавай чIехи межлис кьиле фена. Ана Россиядин жуьреба-жуьре шегьеррай, Дагъустандин хейлин районрайни хуьрерай атанвай мугьманри, республикадин общественный, военный, сиясатдин деятелри, алимри, журналистри иштиракна. И мярекатдикай гегьенш макъала «Лезги газетдин» къведай нумрадай (21-нумра, 2017-йисан 25-май) кIелиз жеда.
РикIел хкин, РФ-дин Президент В.Путинан 2017-йисан 22-февралдин 83-нумрадин Указдалди ва РФ-дин оборонадин министр С.Шойгудин 2017-йисан 22-февралдин 114-нумрадин Приказдалди Краснодарский крайда гьавадин космический къуватрин дивизиядин командир, ери-бине Кьурагь райондин Штулрин хуьряй тир ГЬАЖИЕВ Тагьир Минетуллагьовичаз генерал-майордин чин ганай.
Т.М.Гьажиев 1960-йисуз дидедиз хьана. 1977- йисуз ада Белиждин 1-нумрадин юкьван школа лап хъсан къиметралди акьалтlарна. Гьа и йисуз ам авиациядин летчикарни штурманар гьазурзавай Ставрополдин маршал В.Судецан тlварунихъ галай авиациядин высший военный училищедик экечlна. Инаг ада яру дипломдалди куьтягьна. Ахпа эскадрильядин командирдин къуллугъдал алаз Т.Гьажиев РФ-дин ПВО-дин Гьавадин военный академиядик экечlна. 1992-йисуз анаг къизилдин медалдалди акьалтlарна. Идалай гуьгъуьниз ада авиациядин хиле са жерге жавабдар къуллугърал кlвалахна. Россиядин Генштабдин курсара чирвилер къахчурла, Т.Гьажиев Чита шегьерда авай гьавадин космический къуватрин дивизиядин командирдин заместителвиле тайинарна.
Дивизиядин командир РФ-дин лайихлу военный летчик, Ватандин вилик военный рекьяй лайихлувилерай” ордендин сагьиб я.
«Лезги газет»
