Чубарук
«Гатфар!» лугьуз, чи ракIарар гатайла,
ЧIив-чIивдин ван чи айванра гьатайла,
Шад жеда рикI, вун хтай чIал кьатIайла,
Чан чубарук, вун хтана, рагъ атуй!
Хтанва вун, яргъал рекьер атIана,
КIуфал мани алазва ви датIана,
Чи чIерейрик муг туькIуьра, кутIана,
Чан чубарук, вун хтана, рагъ атуй!
На вуч тIуьна яргъал, къариб чилерлай?
ГьикI хъвана яд а чилерин хуьлерлай?
ГьикI хтана вацIарилай, гьуьлерлай?
Чан чубарук, вун хтана, рагъ атуй!
ГьикI тир гьалар вун алукьай чкайрин,
Лув ганани на винелай чкIайрин,
ХарапIнавай женгерини ккIайри?
Чан чубарук, вун хтана, рагъ атуй!
Вун чи патаз кIан я даим, сагъ хтуй!
Яр ятIа вун…
Яр ятIа вун, зи бахтуниз на янавай яр гьинава?
На хиве кьур зи уьмуьрдин йикъараллай зар гьинава?
Алцур хьана яд ксарин гафарал вун, дегишна рехъ,
За ваз кхьей пак ашкъидин муьгьуьббатдин чар гьинава?
Чаравилин дерт эхна за, йисар фена сузайривди,
Чир жеда ваз, зун акурла, тIурфан гьина, хар гьинава.
Кьунач хабар зи гьалдикай, чарадакай на яр кьуна,
«Сейли» лугьуз, ишедай вун, бес гила и тIвар гьинава?
«Лезги газетдин» 2019-йисан 27-нумрадай
________________________________________________________________
* * *
Йифиз-юкъуз рахазва вун,
ахвар атIай къари ян, гьуьл?
Дерт авани эхиз тежер,
даима ви тIазва гуьгьуьл?
Свас ятIа вун, руш ятIа вун,
кIанидавай къакъатнавай?
Шехьирдалди гьуьл хьанва вун,
кIватIнава на накъвар туькьуьл.
Гагь и кьере, гагь а кьере акьазва ви гур лепеяр,
Вучиз ятIа, секин тушир хиялар хьиз хьанва къе гъуьл.
Рахух жуван дердерикай, яб гуда за, сабур я зун,
Ацукьда зун ви кьерел тек, ягъ Сейлидиз дерт гвай кфил…
Цацар
КIан хьайила, салам гана, гъил вугуз
Кьулан вацIун а патаз,
АкIизва чи цаз гъиле,
Чухвазва гъил цацари.
Ашукь хьана килигзамаз
Хайи чилин иервилиз,
АкIизва чи цаз виле,
Чухвазва вил цацари.
Цаз квай чIавар…
Цаз квай гафар…
Вучиз дуьнья кьунва къе икI цацари?
Чи эвердин, чи гьарайдин
Къвезвач жал ван гъуцариз?
ГьикI эхзава цавари?
Ава цIуцIрум чи рикIера
Цацар алай чIаварин.
Чухвазва рикI цацари.
Чи мурадар элкъуьрна гьикI
Тунва симин цацара?
Гьахъ гьинава, эцигнаван
Лезгидин гъил агакь тийир кьацIара?
Цаз квай чIавар…
Цаз квай чавар…
Цаз квай гафар…
«Лезги газетдин» 2020-йисан 2-нумрадай
