Дильшад Гьуьсейнова

Фарида

Къумрал гъвечIи Фарида,

Ви тариф за ийида.

ЧкIай кIвалах акурла,

РикI жизбина аткида.

 

Экуьнахъ фад къарагъиз,

Дуьньяд крар суракьиз,

Лиф хьана са эгечIда,

Писни хъсан  чарайиз.

 

Ингье гъвечIи Фарида

ЭкъечIнава секуьдал.

Вечрехъ, кIелехъ гелкъведа,

Кал нехирдай хкида.

 

ГъвечIи Гьасрет

Салам, салам, гъвечIи Гьасрет.

Аллагьди ваз гурай нуьсрет.

Гьалал хьурай дидедин нек,

Игитривай къачу жуьрэт.

Шад хьана чун, хьайила вун,

Стхад бала, бедендин чIун.

Эмедин рехъ яргъал хьана,

Виш йисари хуьрай ви дун.

Алиман хва Гьасрет бала,

Ви еришрал чи вил ала.

Вал бубадин тIвар эцигна,

АтIуй лугьуз даим чIала…

 

Фаина

Фаина, ваз кIамаз тахьуй,

Ви тарифни ийин за къе.

Ви уьмуьрда ваз бахтар гуй,

Милайим руш, руьгьдин бике!

 

Эхь-эхь-эхь,

Кьилел къизил чIарар ала ви, Фаина­.

Эхь-эхь-эхь,

Мецел ширин гафар ала ви, Фаина.

 

Ви сивеллай хъверди лап  шад

Вун нини хьиз  чIагурзава.

ГъвечIиди туш вилерин ад —

Цавариз вун машгьурзава.

«Лезги газетдин» 2019-йисан 10-нумрадай