«Къурушрин сес» газетдикай

«Къурушрин сес» газет 2007-йисалай акъатзава. Виликдай къурушвийрихъ «Зегьметдин пайдах» тIвар алай газет авай. Перестройкадин девирда адан кIвалах акъваз хьана.

Са кьадар йисар арадай фейила, лезгийрин бажарагълу шаир Лезги Арифа (Аллагьди вичиз рагьметар гурай), чкадин мухбиррин куьмекдалди «Къурушрин сес» тIвар алай газет арадал гъана. Къенин юкъуз Дагъустанда мад са хуьруьхъни авачир газет къурушвийрихъ ава.

SONY DSC

Алай вахтунда газетдин кьилин редактордин везифаяр Лезги Арифан хва, «Лезги газетдин» кьилин редактордин заместитель, бажарагълу шаир Муса Агьмедова тамамарзава. Газетдин тираж 1000-дав агакьнава ва ам Дербентда, Хасавюртда, Къизилюртда, Къизлярда, Тарумовкада, Докъузпара ва Хасавюрт районра, Москвада, Санкт-Петербургда, Нижний Новгородда, Белоруссияда, Азербайжанда уьмуьрзавай къурушвийри кIелзава.

Газетдин чинрал къурушвийрин уьмуьрда кьиле физвай вакъиайрикай, ЦIийи ва Вини Къурушдал авай хабаррикай, хуьруьн майишатдикай макъалаяр кхьизва, къурушви шаиррин эсерар чапзава. Газетдин чинрал вири лезги халкьдиз талукь рубрикаярни тешкилнава. Ахьтинбурукай сад яз «Лезги ким» къалуриз жеда.

«Къурушрин сес» газетдин редакция Хасавюрт райондин Къурушрин хуьре ава. Ам Махачкъалада чапзава. Газетдин редакциядин электронный адрес: goloskurusha@yandex.ru