Скачать

«Лезги газетдин» цIийи 10-нумра чапдай акъатнава. Ам мухбир Дашдемир Шерифалиева Ахцегьрин машгьур гьамамрикай кхьенвай макъаладилай гатIунзава. Авторди алай вахтунда гьамамар авай гьалдикай, туристар желб авун ва инсанрин сагъламвал мягькемарун патал адахъ авай мумкинвилерикай суьгьбетзава.

«Чи ватанэгьлияр – гьар сана» рубрикадин кьилин игит и сеферда Татарстан Республикада кIвалахзавай са лезги духтур я.

Эдебиятдин чина чи газет кIелзавай дишегьлийрин эсерар ганва.

Политикадин отделдин редактор Нариман Ибрагьимова «Гележегдин бине» макъалада са шумуд дишегьлидихъ галаз алай девир, дуьнья кьиле физвай вакъиаяр, яшайишдин шартIар ва маса месэлаяр веревирдзава.

Газетдин цIийи нумрада Дагъустандин сиясатдин уьмуьрда кьиле фенвай вакъиайрикай, диндикай, медениятдикай, тарихдикай, сагъламвиликай, пенсийриз талукь месэлайрикай ва маса темайрай кхьенвай макъалаяр гьатнава.

Бикеханум Алибеговадин «Чубандин хва — министр» макъалани фикир желбдайди я.

Буюр, кIела, играмибуру цIийи нумра. Чахъ галаз алакъа хуьз, чаз макъалаяр рекье тваз рикIелай алудмир!