5-октябрдиз Дербент райондин администрациядин чlехи залда шад гьалара муаллимрин югъ къейдна.
Мярекатда Дербент райондин кьил Мегьамед Желилова, Кьиблепатан территориальный округда РД-дин Кьилин патай тамам ихтиярар ганвай векил Энрик Муслимова,РД-дин Халкьдин Собранидин депутат Яхья Гьажиева, райондин депутатрин Собранидин председатель Мажмутдин Семедова, Дербентдин педколлеждин директор Шарафутдин Сеидова райондин кьилин заместителри, школайрин директорри , муаллимри ва масабуру иштиракна.
Кlватl хьанвайбурун вилик экъечlна рахай Мегьамед Желилова вири муаллимриз лагьана:
— Гьуьрметлу муаллимар, педагогвилин зегьметдин ветеранар, за квез рикlин сидкьидай пешекарвилин сувар мубаракзава. Муаллимвилин пешедиз жуван уьмуьр бахшнавай инсанар са гафнии авачиз кьетlен гьуьрмет авуниз лайихлу я. Квез инсанрин арада чlехи авторитетни ава. Муаллим вири вахтара вичин кар вилик тухудай зегьметкеш кас я. Иниз килигна муллимвилин пешеда гьамиша лап хъсанбур амукьзава- уьлкведин къизилдин фонд , даяхни дамах, образование вилик тухудай кардиз вафалубур. Дербент райондин администрациядин, райондин депутатрин патай за квез куь регьят тушир, амма лап герек ва гьакъисагъ зегьметдай, куь регьимлувиляй, къайгъударвиляй, сабурлувиляй ва вафалувиляй чухсагъул малумарзава. Квехъ куь пешекарвилин рекье генани чlехи агалкьунар, мягькем сагъламвал, хушбахтлувал ва ислягьвал хьун алхишзава.
Трибунадихъ Энрик Муслимов экъечlна.
— Гьуьрметлу муаллимар! Заз квез жуван патай ва Дагъустан Республикадин Кьилин патай куь пешекарвилин сувар-муаллимрин югъ мубаракзава. Муаллимдиз гьамиша гьуьрмет авайди я ва вири вахтара муаллимдиз зегьметдиз чlехи истемишунарни хьайиди я. Гилани гьакl я. Куьне гьар юкъуз куь чирвилерни уьмуьрдин тежриба акьалтзавайй несилдин кьиле твазва. За квез сагъвал, агалкьунар ва хушбахтлувал хьун алхишзава. Къуй куь ученикри квек гьамиша шадвал ва гьевес кутурай.
Муаллимриз сувар гьакlни Геджух школадин директор Икрам Бебетова, Лукlарин школадин урус чlаланни литературадин муаллим Тамила Жафаровади, Шарафутдин Сеидова, аялрин патай Чинардин 2-нумрадин СОШ-дин ученик Рамазан Хрдамиева мубаракна.
Са жерге муаллимрив РД-дин образованидин ва илимдин министерстводин, райондин администрациядин патай Гьуьрметдин грамотаяр, Кьиблепатан территориальнай округдин патай чухсагъулдин чарар вахкана.
Мярекатдин тешкилатчийри школайра кlелзавай жегьил артистрин куьмекдалди гьазурнавай суварин концерт виридаз хуш хьана. Мярекат рикlел аламукьдай шикил ягъуналди акьалтlарна.
Къагьриман Ибрагьимов
